USHIRIKA SI SEHEMU YA ‘KUPIGA DILI’-MAJALIWA

  Waziri Mkuu, Kassim Majaliwa akitazama mitambo mipya ya kuchambua pamba inayofungwa katika kiwanda cha Manonga wilayani Igunga akiwa katika ziara ya kikazi mkoa wa Tabora  Agosti 16, 2018. Kushoto ni Mkuu wa Mkoa Tabora, Aggrey Mwanri.

NA OWM, IGUNGA

WAZIRI MKUU Kassim Majaliwa amewataka viongozi wa vyama ushirika wawatumikie wanachama wao ipasavyo na wasidhani hiyo ni sehemu ya ‘kupiga dili’.

Amesema Serikali itawachukulia hatua kali viongozi wote wa vyama vya ushirika watakaobainika kuhujumu wanaushirika, hivyo amewataka wafanye kazi kwa uaminifu.

Aliyasema hayo jana jioni (Alhamisi, Agosti 16, 2018) wakati akizungumza na wananchi katika mkutano wa hadhara uliofanyika kwenye kijiji cha Chomachankola.

Hata hivyo, Waziri Mkuu aliwataka viongozi wa chama Kikuu cha Ushirika cha Mkoa wa Tabora cha Igembensabo cha kuhakikisha wanasaidia wakulima katika kujiunga na huduma ya bima ya afya.

Alisema tayari Mfuko wa Taifa wa Bima ya Afya (NIHF) umeanzisha huduma kwa ajili ya wanachama wa vyama vya ushirika ambao wanatakiwa kuchangia sh. 75,000 kwa mwaka.

Waziri Mkuu alisema wanachama hao wakijiunga na NIHF watapata fursa ya kutibiwa bure wao, wenza wao na watoto wanne kwenye hospitali mbalimbali nchini ikiwemo ya Muhimbili.

Pia aliwahamasisha wananchi wa wilaya hiyo wajiunge na Mfuko wa Afya wa Jamii (CHF) ili waweze kuwa na uhakika wa kupata matibabu wao pamoja na familia zao kwenye hospitali zilizoko ndani ya mkoa Tabora bure.

Katika hatua nyingine, Waziri Mkuu amewataka wakulima wa zao la pamba wajiandae kwa kupanua mashamba yao katika msimu ujao wa kilimo kutokana na uwepo ya masoko ya uhakika.

Waziri Mkuu alisema kwa sasa kuna viwanda vingi vya kuchambua pamba ambavyo vimeanza uzalishaji na baadhi ya wamiliki wake wamelalamikia upungufu wa malighafi.

Pia Waziri Mkuu aliwataka vijana waache tabia ya kukaa vijiweni na kucheza ‘pool’ badala yake wajishughulishe na kilimo cha zao la pamba ili waweze kujikwamua kiuchumi na kuondokana na utegemezi.

 Waziri Mkuu, Kassim Majaliwa akitazama eneo inaposimikwa mitambo mipya ya kuchambua pamba  katika kiwanda cha Manonga wilayani Igunga wakati alipokitembelea kiwanda hicho akiwa katika ziara ya kikazi mkoa wa Tabora, Agosti 16, 2018. Kiwanda hicho ambacho kilisimamisha  uzalishaji miaka 25 iliyopita kimefufuliwa na wamiliki wake , Chama Kikuu cha Ushirika cha mkoa wa Tabora, Igembensabo na Kampuni ya M/S Rajani Metals and Machinery kutokana na hamasa kubwa ya uchumi wa viwanda inayofanywa na serikali.

 Wafanyakazi wa kiwanda cha kuchambua pamba cha Manonga wilayani Igunga wakichapa kazi wakati Waziri Mkuu, Kassim Majaliwa alipokitembelea kiwanda hicho akiwa katika ziara ya kikazi mkoa wa Tabora,  Agosti 16, 2018. Kwanda hicho ambacho kilisimamisha  uzalishaji miaka 25 iliyopita kimefufuliwa na wamiliki wake , Chama Kikuu cha Ushirika cha mkoa wa Tabora, Igembensabo na Kampuni ya M/S Rajani Metals and Machinery kutokana na hamasa kubwa ya uchumi wa viwanda inayofanywa na Serikali.

 Wafanyakazi wa kiwanda cha kuchambua pamba cha Manonga wilayani Igunga wakichapa kazi wakati Waziri Mkuu, Kassim Majaliwa alipokitembelea kiwanda hicho akiwa katika ziara ya kikazi mkoa wa Tabora,  Agosti 16, 2018. Kwanda hicho ambacho kilisimamisha  uzalishaji miaka 25 iliyopita kimefufuliwa na wamiliki wake , Chama Kikuu cha Ushirika cha mkoa wa Tabora, Igembensabo na Kampuni ya M/S Rajani Metals and Machinery kutokana na hamasa kubwa ya uchumi wa viwanda inayofanywa na Serikali.

Waziri Mkuu, Kassim Majaliwa akiwahutubia  wananchi wa kijiji cha Chomachankola wilayani Igunga akiwa katika ziara ya kikazi mkoa wa Tabora, Agosti 16, 2018.  (Picha na Ofisi ya Waziri Mkuu)