WAZIRI MKUU MAJALIWA ATOA WITO KWA WATANZANIA KWENDA KUFUNDISHA KISWAHILI NJE YA NCHI

Charles James, Michuzi TV

SERIKALI imewatoa wito kwa watanzania kukimbilia fursa ya kufundisha lugha ya Kiswahili

Nje ya Nchi ikiwa ni baada ya lugha hiyo adhimu kukua kwa kasi hadi kwenye mataifa makubwa.

Wito huo umetolewa na Waziri Mkuu, Kassim Majaliwa leo bungeni jijini Dodoma wakati akijibu swali la Mbunge wa Kawe, Askofu Josephat Gwajima aliehoji jitihada ambazo serikali imezichukua katika kukuza kiswahili duniani.

Waziri Mkuu Majaliwa amesema kwa kufahamu mwamko wa lugha hiyo kwenye mataifa mengine tayari serikali imeziagiza Balozi zake zote kuwa na kituo maalum cha kufundishia lugha ya kiswahili lengo likiwa ni kupanua lugha hiyo.

" Ni kweli kiswahili kinazidi kukua na kushika kasi hadi kwenye mataifa makubwa kiasi kwamba hata Televisheni na Radio kubwa zimeanzisha vipindi vyao mahususi ambavyo vinafanywa kwa lugha ya kiswahili.

Kwa kutambua fursa ya kiswahili katika kukuza uchumi tumeagiza Balozi zetu kuwa na vituo hivyo ambapo sasa watanzania watapata fursa ya kwenda kuwa walimu jambo ambalo litapunguza changamoto ya ajira na kuiletea nchi yetu pia mapato," Amesema Waziri Mkuu Majaliwa.