WIZARA YA ARDHI KUANZISHA MFUKO WA KUBORESHA MAKAZI

 

Mkuu wa mkoa wa Dodoma Dkt Bilinith Mahenge akifafanua jambo

wakati akizindua Maadhimisho ya Siku ya Makazi Duniani jijini Dodoma

leo tarehe 5 Oktoba 2020.

Mkurugenzi wa Maendeleo ya Makazi Wizara ya Ardhi Nyumba na

Maendeleo ya Makazi Deogratius Kalimenze akizungumza wakati wa

Maadhimisho ya Siku ya Makazi Duniani yaliyofanyia jijini Dodoma leo

tarehe 5 Oktoba 2020.

Mkurugenzi Msaidizi Kitengo cha Usanifu Miji na Mipango

Kabambe Wizara ya Ardhi Nyumba na Maendeleo ya Makazi Immaculate Senje

akizungumza wakati wa Maadhimisho ya Siku ya Makazi Duniani

yaliyofanyika jijini Dodoma leo tarehe 5 Oktoba 2020.

Mkuu wa mkoa wa Dodoma Dkt Bilinith Mahenge (katikati

waliokaa) akiwa katika picha ya pamoja na Maafisa kutoka Idara na

Taasisi mbalimbali wakati wa Maadhimisho ya Siku ya Makazi Duniani

yaliyofanyika jijini Dodoma leo tarehe 5 Oktoba 2020.

Na Munir Shemweta, WANMM DODOMA

WIZARA ya Ardhi Nyumba na Maendeleo ya Makazi katika kukabiliana na

changamoto za kifedha na kutekeleza matakwa ya kisera inatarajia

kuanzisha mfuko wa kuboresha makazi na ujenzi wa nyumba za gharama

nafuu.

Hayo yamebainishwa leo tarehe 5 Oktoba 2020 jijini Dodoma kupitia

hotuba ya Waziri wa Ardhi Nyumba na Maendeleo ya Makazi William Lukuvi

iliyosomwa kwa niaba na Mkuu wa mkoa huo Dkt Bilinith Mahenge.

Kupitia hotuba yake Waziri Lukuvi amesema, Mfuko huo una lengo la

kuwawezesha wananchi wa kipato cha chini kupata nyumba bora za gharama

nafuu au kupanga.

Amesema, Mfuko wa kuboresha Makazi utaanzishwa kwa kutumia tengeo la

bajeti ya Serikali na unatarajiwa kujiendesha kwa kutumia vyanzo

vingine vya mapato vikiwemo riba kutokana na mikopo itakayotolewa kwa

wananchi na taasisi zinazojishughulisha na maendeleo ya nyumba.

Aidha, kupitia maadhimisho hayo ya Siku ya Makazi Duniani aliziagiza

ofisi za ardhi za mikoa na mamlaka ya upangaji kusimamia kikamilifu

zoezi la utambuzi, upangaji, upimaji na umilikishaji wa makazi kwa

kufuata sheria, kanuni, taratibu na miongozo iliyotolewa ili kila

mwananchi mwenye kiwanja na nyumba sehemu zinazokubalika kisheria

aweze kumilikishwa.

Sambamba na hilo alizitaka Halmashauri zote nchini kuwapatia

waendelezaji miliki huduma watakazohitaji kama vile kuainisha maeneo

yaliyoiva kimipango miji, kuandaa mipango ya uendelezaji miji, kupima

viwanja na kuweka miundo mbinu.

‘’Halmashauri zinapaswa kutoa hati miliki za ardhi na vibali vya

ujenzi kwa wakati bila kusahau jukumu la msingi la kusimamia na

kukagua utekelezaji wa miradi ya ujenzi’’ alisema Lukuvi kupitia

hotuba yake.

Kwa upande wake Mkurugenzi wa Maendeleo ya Makazi Wizara ya Ardhi

Nyumba na Maendeleo ya Makazi Deogratius Kalimenze alisema wakati

Tanzania ikiadhimisha siku ya makazi duniani inaonesha kuna uhitaji

mkubwa wa makazi bora katika maeneo ya mijini na vijini kutokana na

ongezeko la watu na kubainisha kuwa kati ya asilimia 70 hadi 80 ya

makazi nchini yapo katika maeneo yasiyo rasmi.

Amefafanua kuwa Tanzania bado ina uhaba mkubwa wa nyumba hasa kwa

wananchi wenye kipato cha chini na kubainisha kuwa zaidi ya asilimia

80 ya nyumba zilizojengwa zimegharimiwa na wananchi wenyewe.

Siku ya Makazi Duniani huadhimishwa kila jumatatu ya kwanza ya mwezi

Oktoba ya kila mwaka na siku hiyo huadhimishwa kwa njia mbalimbali

ikiwa ni pamoja na kutafakari hali ya makazi katika nchi na ujumbe wa

mwaka huu ni Nyumba kwa wote Miji bora ya Baadaye.