TCRS YAWAMWAGIA MISAADA WENYE ULEMAVU

…………………………………………………………………

NA VICTOR MAKINDA

Shirika la Kikristu la Kuwahudumia Wakimbizi (TCRS) mkoa wa Morogoro, limetoa misaada mbali mbali kwa watu wanaoishi na ulemavu katika kata nne za Halmashauri ya wilaya ya Morogoro mkoani Morogoro.

 Akizungumza wakati wa kutoa misaada hiyo, Afisa Mwezeshaji wa TCRS mkoani humo, Gasper Werema, alisema kuwa wao kama shirika wameguswa na changamoto mbali mbali

zinazowakabili watu wanaoishi na ulemavu na hivyo kuona umuhimu wa kuwasaidia.

“Tumewapatia Radio ambazo zinatumia mwanga wa jua, sabuni na ndoo za kunawia maji.” Alisema Werema.

 Werema aliongeza kusema kuwa watu wanaoishi na ulemavu wana haki sawa na watu wengine ikiwa ni pamoja na haki ya kupata habari, hivyo wameona ni vema kuwapatia radio ili waweze kusikiliza habari na vipindi vya kuelimisha juu ya janga la corona na masuala ya uchaguzi ikizingatiwa kuwa Taifa lipo katika kipindi cha kampeni za uchaguzi mkuu.

 Alisema kuwa misaada ya vifaa hivyo umegharimu kiasi cha Shilingi   17.5 Milioni huku wenye ulemavu 389 wakinufaika na msaada huo sambamba na shule za msingi na vituo vya afya. 

 Akizungumza mara baada ya kupokea msaada huo,mmoja wa wanufaika wa msaada huo, Hemed Mvuambaya, ambaye ana ulemavu wa miguu mkazi wa kijiji cha Kibungo kata ya Mikese, alisema kuwa analishukuru shirika la TCRS kwa kumpatia msaada wa Radio kwa kuwa itakuwa faraja kwake na atapata fursa ya kujielimisha masuala mbali mbali ya kijamii.

“ Sisi tunaoishi na ulemavu hasa walemavu wa miguu, kutwa nzima tupo nyumbani. Tunapitwa na habari nyingi na vipindi ambavyo vinatoa elimu. Msaada huu wa radio utanisaidia kupata elimu juu ya sheria sera na haki  zinazowahusu wenye ulemavu lakini pia nitapata fursa ya kusikiliza vipindi vya michezo ambavyo vitanipa burudani na faraja.” Alisema Hemedi.

Akizungumzia misaada iliyotolewa na shirika la TCRS Mganga Mkuu wa Halmashauri ya Wilaya na Morogoro, Robert Manyerere, alilishukuru shirika hilo huku akitoa wito kwa watu binafsi na mashirika mbali mbali kuwasiadia  watu wanaoishi na  ulemavu.

“ Sisi kama Halmashauri kwa niaba ya Mkurugenzi tunalishukuru shirika la TCRS kwa kutoa misaada kwa kundi hili la wenye ulemavu na maeneo mengine kama vile zahanati na shule za misingi. Wito kwa jamii ya Kitanzania tuwasaidie wenye ulemavu ili wasijione kama kundi lililotengwa katika jamii.”. Alisema Dkt Manyerere.