WANANCHI MTWARA WASHAURIWA KUJIEPUSHA NA MAGENDO

Afisa Forodha TRA Mtwara, Salvatory Chami akitoa elimu kwa wananchi wa kijiji cha Kitaya wilaya ya Mtwara kuhusu faida za kutumia vituo vya forodha halali kupitisha bidhaa kutoka nje ya nchi

Wananchi wa kijiji cha Kivava wakimsikiliza kwa makini Jackline Lutatare, Afisa Usimamizi wa Kodi

Afisa Forodha TRA Mtwara, Salvatory Chami akitoa elimu kwa wananchi wa kijiji cha Msimbati wilaya ya Mtwara kuhusu faida za kutumia vituo vya forodha halali kupitisha bidhaa kutoka nje ya nchi

Afisa Forodha TRA Mtwara, Salvatory Chami akitoa elimu kwa wananchi wa kijiji cha Kivava wilaya ya Mtwara kuhusu faida za kutumia vituo vya forodha halali kupitisha bidhaa kutoka nje ya nchi

Bi Valentina Bartazar, Afisa Mkuu Usimamizi wa Kodi akitoa elimu kuhusu athari ya biashara ya magendo kwa wananchi wa kijiji cha Kitaya

………………………………………………………………………………………………………..

Na Oliver Njunwa-Mtwara

Wananchi wanaoishi katika vijiji vilivyoko pembezoni mwa Bahari ya Hindi Mkoani Mtwara, wamehimizwa kuwa walinzi wa mipaka ya nchi kwa kutoa taarifa kuhusu biashara za

magendo ili kuepukana na athari zinazotokana na biashara ya magendo na matumizi ya bidhaa za magendo.

Wito huo umetolewa na Afisa Mkuu Usimamizi wa Kodi kutoka Mamlaka ya Mapato Tanzania (TRA) Valentina Bartazar wakati akitoa elimu ya uzuiaji wa bidhaa za magendo katika nyakati tofauti kwa wananchi wa vjijiji vya Msangamkuu, Msimbati, Kivava, Kitaya na Dindwa wilaya ya Mtwara, Mihambwe na Chikongo Wilaya ya Tandahimba na Chikunya Wilaya ya Newala mkoani Mtwara.

“Tunawasihi wananchi kutoa taarifa kuhusu shughuli za magendo zinazofanyika katika maeneo yenu ikiwemo uingizaji wa bidhaa za magendo ili kuwaepusha na madhara ya shughuli za magendo na matumizi ya bidhaa za magendo”, alisema Bi Bartazar na kuongeza kwamba vitendo vya magendo vinaathaari za kiafya, kijamii, kiuchumi, pamoja na kiusalama kwa wananchi wa maeneo husika na taifa kwa ujumla.

Bi Bartazar alisema kwamba bidhaa za magendo ni hatari kwa afya za wananchi kutokana na ukweli kwamba bidhaa hizo zinapoingizwa nchini hazifuati utaratibu wa kuthibitishwa ubora na taasisi zinazohusika kama Shirika la Viwango Tanzania (TBS). Pia bidhaa za magendo 

Pamoja na kuwa na athari kiafya bidhaa za magendo pia zinadidimiza uchumi wa nchi kwa kuwa hazilipiwi kodi na hivyo kukwamisha juhudi za serikali za kuongeza mapato ya ndani ili nchi iweze kujitegemea na kuimarika kiuchumi.

Aidha aliwahimiza wafanyabiashara kutumia vituo vya forodha vilivyohalalishwa kupitisha mizigo ili kulipa kodi halali ya serikali pia kuepuka kupata hasara baada ya bidhaa hizo kukamatwa na kutaifishwa. 

Bi Bartazar amesema kwamba TRA imeamua kuendesha kampeni ya uelimishaji kuhusu uzuiaji wa biashara ya magendo ili wananchi wafahamu athari zake pamoja na kufahamu faida za kutumia vituo vya forodha vilivyoidhinishwa na serikali.

Naye Afisa Forodha wa TRA Mtwara Salvatory Chami aliwaambia wananchi hao kwamba baadhi ya bidhaa wanazoingiza nchini kwa njia ya magendo kutoka nchi jirani ya Msumbiji hazistahili kulipiwa kodi kutokana nchi hizo kuwa na makubaliano ya kibiashara.

Akawaeleza kwamba wananchi wengi wanaingiza bidhaa kwa magendo wakidhani wanakwepa kodi kumbe bidhaa wanazoingiza hazistahili kulipiwa kodi na wakikamatwa wanatozwa faini na hivyo kuathiri kipato chao.

“Ofisi za TRA ziko wazi kwa ajili ya kuwashauri wananchi ambao wanataka kufanya biashara ya kuingiza bidhaa ndani ya nchi. Hivyo wananchi wanashauriwa kutembelea ofisi hizo kupata ushauri kabla ya kufanya bashara ili waweze kufahamu bidhaa zinazostahili kulipiwa ushuru na ambazo hazistahili kulipiwa ushuru, bidhaa zinazostahili kuingizwa nchini pamoja na viwango vya kodi vinavyostahili kutozwa kwa bidhaa zinazoingizwa nchini”, alisema Chami. 

Akizungumzia adhabu za kufanya magendo kwa mujibu wa sheria, Chami aliwwambia wananchi hao kwamba wanaweza kutozwa faini ambayo ni asilimia 50 ya thamani ya mzigo ulioingizwa kwa magendo, kutaifishwa kwa vyombo ambavyo vimetumika kubeba bidhaa za magendo pamoja na kufunguliwa mashtaka na kufungwa jela.

Ili kufanya biashara kwa uhuru akawahimiza wananchi kutumia vituo vya forodha na kupata nyaraka stahiki zinazowaruhusu kuingiza bidhaa na kuziuza nchini.

Wakizungumza kwa nyakati tofauti wakati wa kampeni hiyo, wananchi wa vijiji hivyo wameiomba serikali kuhalalisha vituo vya forodha vilivyo jirani na vijiji hivyo ili waweze kufanya biashara halali na kulipa kodi stahiki.

“Sisi tuko tayari kulipa kodi kwa mujibu wa sheria endapo vituo vilivyo jirani yetu vitawekwa ofisi ya TRA ili kuturahisishia kuingiza bidhaa kutoka Msumbiji ambazo zinapatikana kwa urahisi”, alisema Ahmad Juma mkazi wa kijiji cha Chikunya katika Wilaya ya Newala.

Katika hatua nyingine baadhi ya viongozi wa vijiiji hivyo wameipongea TRA kwa kuamua kuwaelimisha wananchi juu ya athari za shughuli za magendo na faida ya kutumia vituo halali kwa kuingiza bidhaa nchini.

Hamdani Mohammed ni afisa Mtendaji wa Kijiji cha Msangamkuu kilichopo Wilaya ya Mtwara ambaye amesema kwamba elimu hii inahitajika mara kwa mara ili kuwakumbusha wananchi umuhimu wa kulinda mipaka yao kwa kuzuia vitendo vya biashara ya magendo.

Pamoja na TRA kutoa elimu kuhusu uzuiaji wa biashara za magendo kwa wananchi wanaoishi pembezoni mwa Bahari ya Hindi na Mto Ruvuma pia wananchi walipata fursa ya kuuliza maswali pamoja na kutoa maoni kuhusu shughuli na huduma zinazotolewa na TRA.

Kampeni ya elimu kuhusu uzuiaji wa magendo nchini inaendelea katika mikoa ya Dar es salaam, Mtwara na Tanga lengo likiwa ni kuwaelimisha wananchi wanaoishi kando kando ya Bahari ya Hindi na sehemu zinatumika kupitisha bidhaa za magendo kuhusu madhara ya matumizi ya bidhaa za magendo pamoja na kuwahimiza wananchi kutumia vituo halali kupitisha bidhaa kutoka nje ya nchi.