NDUGULILE AONYA NGOs ZINAZOTAKATISHA FEDHA NA TISHIO KWA USALAMA WA NCHI

Naibu Waziri wa Afya Dkt. Faustine Ndugulile akitoa hotuba yake kwa wajumbe wa Mkutano Mkuu wa Mwaka wa Baraza la  Mashirika yasiyo ya Kiserikali leo Jijini Dodoma.

Naibu Waziri wa Afya Dkt. Faustine Ndugulile akifuatilia mada ya kwanza ya Mkutano Mkuu wa Mwaka wa Baraza la Mashirika yasiyo ya Kiserikali  leo Jijini Dodoma.

Baadhi ya wajumbe wa Mkutano Mkuu wa Mwaka wa Baraza la Mashirika yasiyo ya Kiserikali wakifuatilia kwa makini hotuba ya  Naibu Waziri wa Afya Dkt. Faustine Ndugulile leo Jijini Dodoma.

……………………………..

Na Anthony Ishengoma

Naibu Waziri wa Afya, Maendeleo ya Jamii, Jinsia Wazee na Watoto Dkt. Faustine Ndugulile amesema Serikali haitazifumbia macho NGOs zote zinazojiingiza katika masuala yanayohatarisha

usalama wa Nchi au kujiingiza katika vitendo visivyofaa kama utakatishaji fedha na ugaidi.  

Naibu Waziri Ndugulile amesema hayo wakati wa hotuba yake alipokuwa akifungua Mkutano wa Mwaka wa Baraza la Mashirika Yasiyo ya Kiserikali uliondaliwa na Baraza la Taifa la NGOs mapema leo Jijini Dodoma ambapo ameyataka Mashirika hayo kuepuka vitendo vya udanganyifu.

Aidha Dkt. Ndugulile amewaambia wajumbe wa Mkutano huo kuwa kuna baadhi ya NGOS ambazo zinafanya kazi kwa udanganyifu bila kufuata malengo ambayo yamo katika katiba zilizowasilishwa wakati wa usajili na badala yake zimejiingiza katika matendo yanayohatarisha usalama na kuonya kuwa Serikali haitakuwa tayari kuyapa nafasi Mashirika kama hayo kufanya kazi hapa Nchini.

Dkt. Ndugulile ameyataka Mashirika Yasiyo ya Kiserikali pia kuzingatii vipaumbele vya Taifa ili kuepukana na changamoto ya mashirika mengi kufanya kazi katika eneo moja jambo ambalo linaacha maswali kwa kuwa Tanzania ni moja kwa nini mashirika mengi yanajielekeza na kutoa huduma sehemu fulani ya Nchi wakati kuna maeneo mengine ya kipaumbele yanakuwa hayana mdau wa NGOs hata moja.

Aidha amezitaka NGOs zote Nchini kuzingatia vipaumbele vya Serikali na kuacha tabia ya baadhi ya NGOs zinazoitaka Serikali kufuata matakwa ya NGOs hizo katika suala zima la mahali zinapotaka kufanya kazi.

Katika hotuba yake kwa Wajumbe wa Mkutano huo Dkt. Ndugulile ameongeza kuwa kwa sasa Serikali imekamilisha kanzidata ya NGOs zote Nchini lakini pia kuweka mfumo wa kielektroniki ili kuhakikisha taarifa zote za NGOS zinafika kwa wakati.

Aidha Naibu Waziri Ndugulile amezitaka NGOs kote Nchini kuzingatia misingi ya uwazi na uwajibikaji kama ambavyo NGOs zimekuwa zikiitaka Serikali kutekeleza wajibu huo na kuziagiza kuhakikisha zinatangaza na kuweka wazi kiasi cha fedha wanazopata kutoka kwa wafadhili wao ili jamii na Serikali wajue matumizi ya fedha hizo lengo likiwa ni kushirikiana baina ya Serikali, wanufaika na Mashirika hayo.

Mkutano Mkuu wa Mwaka wa Baraza la Mashirika Yasiyo ya Kiserikali unaendelea Jijini Dodoma ambapo Naibu Waziri Ndugulile amewaambia Wajumbe wa Mkutano huo kuwa Serikali inaendelea kuboresha Ofisi ya Msajili wa Mashirika Yasiyo ya Kiserikali na kutumia fursa hiyo kuwambia wajumbe hao kuhusu kukamilika kwa uteuzi wa Mwenyekiti wa Bodi ya Mshirika hayo Dkt. Richard  Faustine Sambaiga.