WAFANYAKAZI WAPYA TAASISI YA MOYO JAKAYA KIKWETE WAMETAKIWA KUFANYA KAZI KWA BIDII NA KUFUATA SHERIA,KANUNI NA TARATIBU ZA UTUMISHI WA UMMA

Mkurugenzi Mtendaji wa Taasisi ya Moyo Jakaya Kikwete (JKCI) Prof. Mohamed Janabi akizungumza na wafanyakazi wapya (hawapo pichani) wakati wa mafunzo mafupi ya utendaji kazi kwa wafanyakazi hao jana katika ukumbi wa taasisi hiyo Jijini Dar es Salaam. Kulia ni Mkuu wa Idara ya Rasilimali watu Bi. Ghati Chacha

Baadhi ya wafanyakazi wapya katika Taasisi ya Moyo Jakaya Kikwete wakimsikiliza Mkurugenzi Mtendaji wa taasisi hiyo Prof. Mohamed Janabi (hayupo pichani) wakati wa mafunzo mafupi ya utendaji kazi kwa wafanyakazi hao jana katika ukumbi wa taasisi hiyo Jijini Dar es Salaam. Jumla ya wafanyakazi wapya 22 ambao ni wauguzi, mhandisi, afisa lishe na wataalamu wa dawa wameripoti tayari kwa kuanza majukumu yao.

……………………..

Na: Genofeva Matemu – JKCI

 Wafanyakazi wapya wa Taasisi ya Moyo Jakaya Kikwete (JKCI) wametakiwa kufanya kazi

kwa bidii na kufuata sheria, kanuni na taratibu za utumishi wa umma kwa kutoa huduma bora na maelekezo sahihi kwa wagonjwa.

Rai hiyo imetolewa na Mkurugenzi Mtendaji wa Taasisi ya Moyo Jakaya Kikwete (JKCI) prof. Mohamed Janabi wakati wa mafunzo mafupi ya utendaji kazi kwa wafanyakazi hao jana katika ukumbi wa Taasisi hiyo Jijini Dar es Salaam.

Prof. Janabi alisema kuwa Taasisi ya Moyo Jakaya Kikwete ni kituo bora cha matibabu “center of excellence” Afrika Mashariki na kati katika kutuo huduma za matibabu ya magonjwa ya moyo hivyo ajira waliyoipata waitumie vizuri na kuleta tija katika nchi ya Tanzania kwa kuepuka vitendo viovu vinavyoweza kuharibu majukumu yao ya kazi.

“Nidhamu katika kutekeleza majukumu ya kazi ni moja ya mafanikio ambayo mfanyakazi anaweza kuyajenga kama atafanya kazi yake kwa utaratibu uliopangwa bila kuvunja kanuni na sheria zilizopo” alisema Prof. Janabi

Aidha Prof. Janabi amewataka wafanyakazi hao kuwahi kazini, kuwaona wagonjwa kwa wakati, kusoma na kuelewa maelekezo kabla ya kutoa huduma kuipenda kazi yao pamoja na kuwa na shauku ya kutaka kujifunza kutoka kwa wafanyakazi wengine waliowazunguka.

Jumla ya wafanyakazi wapya 22 ambao ni wauguzi, mhandisi, afisa lishe na wataalamu wa dawa za binadamu ‘wafamasia’ wameripoti katika taasisi hiyo na kupata mafunzo mafupi tayari kwa kuanza majukumu yao.