Ni jukumu letu sote katika Kupambana na Udhibiti Dhidi ya Dawa za kulevya Nchini

Naibu Waziri Ofisi ya Waziri Mkuu, Bunge, Sera, Kazi, Ajira, Vijana na Wenye ulemavu Mhe. Stella Ikupa Alex (kushoto) akimkabidhi Katibu Mtendaji wa Bodi ya Filamu Tanzania (TFB) Bi. Joyce Fissoo Cheti cha Kutambua mchango wa Bodi hiyo katika kufanikisha Tamasha la KATAA MIHADARATI lililofanyika leo Tarehe 28.12.2018 katika viwanja vya Mburahati Barafu jijini Dar es Salaam. Tamasha hili limeratibiwa na Bodi ya Filamu Tanzania (TFB), Taasisi ya Binti Filamu, pamoja na Tume yakudhibiti na kupambana na dawa za kulevya.

Naibu Waziri Ofisi ya Waziri Mkuu, Bunge, Sera, Kazi, Ajira, Vijana na Wenye ulemavu Mhe. Stella Ikupa Alex (wa tatu kushoto, walio kaa) akiwa kwenye picha ya pamoja na Katibu Mtendaji wa Bodi ya Filamu Tanzania (TFB) Bi. Joyce Fissoo (anaefuata,kulia) Kamishna wa Kinga na Tiba Mamlaka ya Kudhibiti na Kupambana na Dawa za Kulevya Dkt. Peter Patrick Mfisi na Mwenyekiti wa Asasi ya Binti Filamu Bi. Ndumbagwe Misayo(Thea). Kushoto ni

Muwakilishi wa Mbunge wa Ubungo na Diwani wa Mburahati katika Tamasha la KATAA MIHADARATI lililofanyika kwenye viwanja vya Mburahati Barafu jijini Dar es Salaam. Tamasha hili lina lengo la kutoa Elimu kuhusu madhara ya Dawa za Kulevya na limeratibiwa na Bodi ya Filamu Tanzania (TFB), Asasi ya Binti Filamu, pamoja na Mamlaka ya Kudhibiti na Kupambana na Dawa za Kulevya.

…………………………

Na Mwandishi wetu

Naibu Waziri Ofisi ya Waziri Mkuu, Bunge, Sera, Ajira, Vijana na Wenye Ulemavu Mhe. Stella Ikupa Alex ameitaka jamii kushiriki kwa pamoja katika mapambano na udhibiti wa Dawa za kulevya kwa kuhakikisha kila raia mwema kwa nafasi yake anashiriki katika kutokomeza uingiaji, usambazaji na matumizi ya dawa hizo zinazoathiri nguvu kazi na kupelekea mzigo kwa Familia, Jamii na Serikali.

Rai hiyo imetolewa leo katika Tamasha la Kataa Mihadarati lililo ratibiwa na Asasi isiyo ya kiserikali iitwayo Binti Filamu, Bodi ya Filamu Tanzania (TFB) Mamlaka ya Kupambana na Kudhibiti Dawa za Kulevya na Shirika la Bima la Taifa (NIC) lenye kauli mbiu isemayo “Nguvu yako, Afya yako, Jiokoe Uokoe Tanzania” lililofanyika katika viwanja vya Mburahati Barafu Jijini Dar es Salaam.

“Si Serikali pekee yenye dhamana ya kupambana na Udhibiti wa Dawa za kulevya nchini, bali ni jukumu la kila raia mwema wa Tanzania kuhakikisha anatumia nafasi yake kwa kutoa taarifa kwenye Mamlaka husika ili kuweza kudhibiti Uingia, Usambazaji na Matumizi ya Dawa haramu za Kulevya” Alisema Mhe. Stella.

Kwa upande wake Katibu Mtendaji wa Bodi ya Filamu Tanzania (TFB) Bi. Joyce Fissoo alisema Sekta ya  Filamu na Michezo ya Kuigiza ni moja ya Sekta kubwa zinazopunguza tatizo la ajira nchini ikiwa itatumiwa ipasavyo, hivyo Wadau wake wanatakiwa kutojihusisha na matumizi ya Dawa za Kulevya kwani kufanya hivyo kutawapotezea heshima katika jamii na kupelekea kujirudisha nyuma kimaendeleo.

“Sekta ya Filamu ni Sekta Tajiri sana na inahitaji Wadau wasio jihusisha na Dawa za kulevya kwakuwa utumiaji wa Dawa hizo unarudisha nyuma utendaji kazi wao na kushindwa kujikwamua kiuchumi”Alisema Fissoo.

Tumekubali kushirikiana na Binti Filamu ambao ni Wadau wa Bodi kwa kuwa tunaona madhara ambayo yamegusa Sekta ya Ubunifu Filamu ikiwemo. Tutaendelea kushirikiana nao ili kwa pamoja tuokoe kizazi cha sasa na baadae. Ni wajibu wetu kumsaidia Mhe. Rais na ameonesha dhamira ya dhati kuhakikisha Tanzania inaishi bila Dawa  za kulevya. Aliendelea Bi. Fissoo

Matumizi ya Dawa za Kulevya yanapoteza ndoto za Vijana wengie hapa nchini wakiwemo Wadau wa Sekta ya Filamu na Michezo ya Kuigiza ambapo wengi wao hujiingiza katika matumizi ya Dawa hizo bila kujua madhara yake na baadae wanapata madhara makubwa yakiwemo maambukizi ya magonjwa, kupoteza heshima na hata kupoteza maisha.