Benki Ya NMB Yahamasisha Wazazi Kote Nchini Kuunganisha Watoto Wao Na Huduma Za Kibenki

Mkurugenzi Mtendaji wa Benki ya NMB Ineke Bussemaker akimkabidhi Waziri wa Afya, Maendeleo ya Jamii Jinsia Wazee na Watoto Mhe. Ummy Mwalimu fomu za Wajibu na Chipukizi akaunti kwa ajili ya watoto wake kujiunga na huduma hiyo leo makao makuu ya Benki hiyo jijini Dar es Salaam.

Waziri wa Afya, Maendeleo ya Jamii Jinsia Wazee na Watoto Mhe. Ummy Mwalimu akimkabidhi Mwanafunzi wa Darasa la Sita wa Shule ya Msingi Mlimani Latifa Ally zawadi ya Madaftari katika  makuu ya Benki ya NMB leo jijini Dar es Salaam.

Wanafunzi wa darasa la Sita wa Shule ya Msingi Mlimani  wakiwa katika picha ya pamoja na Waziri wa Afya, Maendeleo ya Jamii Jinsia Wazee na Watoto Mhe. Ummy Mwalimu pamoja na viongozi wengine wa NMB mara baada ya kukabidhiwa zawadi na waziri huyo.

Mkurugenzi Mtendaji wa Benki ya NMB Ineke Bussemaker akifafanua aina mbalimabali za huduma ya benki yake  kwa Waziri wa Afya, Maendeleo ya Jamii Jinsia Wazee na Watoto Mhe. Ummy Mwalimu leo makao makuu ya Benki hiyo jijini Dar es Salaam.

Wanafunzi wa darasa la Sita wa Shule ya Msingi Mlimani  wakipata ufafanuzi wa matumizi ya akaunti ya chipukizi kutoka kwa Waziri wa Afya, Maendeleo ya Jamii Jinsia Wazee na Watoto Mhe. Ummy Mwalimu mara baada ya uzinduzi wa huduma hiyo leo jijini Dar es Salaam.

…………….

Na Anthony Ishengoma- Wizara ya Afya

Takwimu za Benki kuu ya Tanzania zinaonesha kuwa asilimia 16 ya Watanzania kwa mwaka huu wamepata huduma ya kibenki ukilinganisha na asilimia 9.1 ya mwaka 2006 ambapo asilimia 48 ya wananchi wamepata huduma za kifedha kutoka taasisi ndogo za huduma za fedha pamoja na malipo kwa njia ya simu ikilinganishwa na asilimia 6.7 ya mwaka 2006.

Waziri wa Afya, Maendeleo ya Jamii, Jinsia, Wazee na Watoto Ummy Mwalimu amesema hayo wakati wa uzinduzi wa kampeni ya kuhamasisha wananchi kufungulia watoto wao akaunti maalumu ijulikanayo kama Wajibu, Chipukizi  na Mwanachuo  kwa wanafunzi wa ngazi zote hapa Nchini kupitia mkakati mpya wa Benki ya NMB ujulikanao pia kama uwezo wa kifedha.

Mhe. Ummy Mwalimu  amesema kuwa kampeni hii ya uwezo wa kifedha inalenga kuhamasisha wanafunzi kote Nchini kujiongezea uwezo wa kutumia huduma za kibenki na pia kujenga nidhamu ya matumizi ya fedha na kujiwekea akiba kwa baadae kwa manufaa ya elimu kwa watoto.

Aidha Mhe. Ummy ameiomba Benki ya NMB kuhunganisha mpango wa huduma ya Toto Afya Kadi maarufu kama akaunti ya elfu 50,400 na akaunti ya Wajibu ili wananchi wenye uwezo mdogo waweze kuweka bima ya matibabu kwa watoto wao kwa kuweka fedha kidodo kidogo ili kufikia kiasi kinachotakiwa kuanzisha bima ya afya ya mtoto.

‘’Wanachi wenye uwezo mdogo wamekuwa wakiniambia kuwa wanapenda sana kushiriki katika mpango wa Bima ya Afya ya mtoto yaani toto afya kadi lakini wamekuwa hawana uwezo wa kulipa elfu 50,400 kama bima ya afya ya mtoto lakini kwa kupitia kampeni ya uwezo wa kifedha ya akaunti ya Wajibu NMB itawawezesha wananchi hao kulipa bima ya afya ya mtoto kwa kuweka kiwango kidogo kidogo,’’ amesema Waziri Ummy Mwalimu.

Wakati huo huo Mkurugenzi Mtendaji wa NMB Ineke Bussemaker amesema kampani ya Wajibu ina maana ya uwajibikaji ikiwa na akaunti tatu za akiba ambazo ni NMB mtoto akaunti inayohusisha watoto chini ya miaka kumi na saba,Chipukizi akaunti ya watoto miaka 13 mpaka 17 na NMB mwanachuo akaunti ya Wanafunzi wa elimu ya juu.

Ameongeza kuwa NMB mtoto akauti inamilikiwa kwa kiasi kikubwa na mzazi wakati akaunti ya Chipukizi inatoa uhuru wa vijana kumiliki akaunti yao ikiwa ni mara ya kwanza hapa Nchini kwa vijana hawa kumiliki na kutumia ATM kadi kama ilivyo kwa wazazi na walezi wao.

Uzinduzi wa kuhamasisha matumizi ya akaunti hizi ni umezinduliwa leo jijini Dare es Salaam na Waziri mwenye dhamana ya masuala ya Watoto mhe. Ummy Mwalimu pamoja na Wanafunzi wa shule ya Msingi Mlimani ambao tayari wanatumia huduma hii ya kibenki baada ya kuwa wamehamisishwa na benki hiyo kutumia akaunti ya Wajibu.