SERIKALI ILIVYOJIDHATITI KUIMARISHA MAADILI YA UTUMISHI WA UMMA.

Na Beatrice Lyimo -MAELEZO-DAR ES SALAAM.

UKIUKWAJI wa maadili ya Viongozi wa Umma na Mgongano wa maslahi katika shughuli za umma ni miongoni mwa changamoto zinazoikumba nchi nyingi duniani.

Changamoto hizo zinapishana kati ya nchi na nchi ikiwemo ukubwa wa tatizo, madhara yake pamoja na mifumo mbalimbali iliyowekwa katika kukubaliana na tatizo hili.

Inaelezwa kuwa matumizi mabaya ya rasilimali za umma, kujilimbikiza mali isivyo halali, upendeleo katika vyombo vya maamuzi, uvujishaji wa taarifa za siri za serikali, ukiukwaji wa maadili ya kitaaluma na mienendo, ni miongoni mwa sababu zinazosababisha ukiukwaji wa maadili.

Dhana ya maadili ya viongozi wa umma inaelezwa ni msingi , kanuni na taratibu zinazoainisha tabia na mienendo inayokubalika na isiyokubalika kwa viongozi wa umma na jamii nzima.

Hivi karibuni Tanzania iliadhimisha siku ya maadili duniani, iliyolenga kuhimiza ukuzaji wa maadili katika utumishi wa umma, utetezi na ulinzi wa haki za binadamu, uwajibikaji, utawala bora na mapambano dhidi ya rushwa, ufisadi na ubadhilifu wa mali za umma.

Akizungumza katika maadhimisho hayo, Makamu wa Rais, Samia Suluhu Hassan anasema ili kufikia uchumi wa viwanda ifikapo mwaka 2025 ni wajibu wa watendaji wa Serikali kuzingatia maadili ya kazi na kuweka mbele maslahi ya umma na kuondoa malalamiko kwa wananchi.nevu na maovu mengine na kila raia kuwa polisi kwa mwenzake.

“Serikali itaendelea kutambua mchango wa taasisi za uwajibikaji na utawala Bora katika jitihada zao za kuimarisha misingi ya Utawala bora, uwazi, uadilifu na uwajibikaji” alisema Samia.

Anazitaja taasisi hizo kuwa ni Ofisi ya Rais-(Utumishi na Utawala bora), Takukuru, Sekretarieti ya Maadili, Ofisi ya Mkaguzi Mkuu wa Hesabu za Serikali (CAG), Tume ya Haki za binadamu, Mamlaka ya Ununuzi wa Umma, Ofisi ya Taifa ya Ukaguzi.

Makamu wa Rais anasema kuwa Serikali itaendelea kutoa ushirikiano katika taasisi hizo ili kuhakikisha zinatoa huduma bora za ukaguzi zenye kuleta tija kwa wananchi na hivyo kuimarisha uwajibikaji na thamani ya fedha kwenye makusanyo na matumizi ya rasilimali za umma.

Anasema kuwa Serikali itaendelea kuziwezesha kiutendaji taasisi hizo ili kuhakikisha zina uwezo wa kukuza na kusimamia viwango vya maadili kwa kutoa elimu, kufanya uchunguzi, kupokea na kuhakiki matamko ya mali na madeni ya viongozi wa umma.

Anaongeza kuwa Serikali itaendelea kulinda rasilimali za umma na kuondoa uonevu na dhuluma, kwa kuimarisha TAKUKURU ili kukabiliana na tatizo hilo.

“Ni jukumu na wajibu wa Serikali kutoa Ulinzi, Usalama na Huduma Bora kwa jamii, lakini ufanisi wa kutekeleza wajibu huu utawezekana endapo watumishi wote wa Serikali watawajibika ipasavyo katika utendaji kazi” aliongeza Samia.

Mkurugezi Mkuu wa Taasisi ya Kuzuia na Kupambana na Rushwa (TAKUKURU), Valentino Mlowola anasema maadhimisho hayo yamelenga katika kuimarisha nidhamu kwa watumishi wa umma kwa kuzingatia kasi ya maendeleo ya Taifa.

Aidha, Mlowola aliwataka viongozi wa dini kutumia fursa waliyonayo kuhubiri maadili kwa waumini wao ili kuweza kuwa na kizazi chenye kuzingatia maadili katika Taifa.

“Kila mmoja anatakiwa kuwajibika kwa namna moja ama nyingine, wazazi, walezi, walimu wanapaswa kuwalea watoto ipasavyo ili kuweza kuwa na Taifa linalozingatia maadili” alisema Mlowola.

Mwenyekiti wa Tume ya Haki za Binadamu na Utawala Bora, Bahame Nyanduga alisema maadhimisho hayo yalilenga utetezi na ulinzi wa haki za binadamu, uwajibikaji, utawala bora na mapambano dhidi ya rushwa, wizi, ufisadi na ubadhilifu wa mali za umma.

“Taasisi za uwajibikaji zinatoa huduma ya kuelimisha wananchi, kutoa ushauri na kupokea malalamiko ya wananchi kuhusu uvunjifu wa haki za binadamu na ukiukwaji wa misingi ya utawala bora” alisema Nyanduga.

Aidha Nyanduga alisema kumekuwa na baadhi ya changamoto zilizoikumba taasisi hizo ikiwemo ufinyu wa bajeti katika kuwezesha huduma za taasisi hiyo zinawafikia wananchi.

Mwakilishi wa Umoja wa Kimataifa, Alvaro Rodrigez aliwataka wananchi kwa ujumla kushirikiana katika kuimarisha haki za binadamu na kuipongeza Serikali ya Tanzania kwa kuanzisha kampeni ya kutokomeza ukatili wa kijinsia dhidi ya watoto na albino.     

Waziri wa Nchi, Ofisi ya Rais Utumishi na Utawala Bora, Angellah Kairuki aliahidi kuendeleza uhusiano na ushirikiano uliopo baina ya Taasisi zinazohusiana na masuala ya maadili na haki za binadamu ili kuweza kukuza maadili nchini.

“Serikali itaendeleza mapambano dhidi ya Rushwa, kudhibiti manunuzi ya umma na kusimamia maadili sambamba na haki za binadamu” alisema Waziri Kairuki.