WALIOKUWA WAKITUMIKISHA WALEMAVU WAACHIWA HURU, WAANGUA KILIO MAHAKAMANI

Na Karama Kenyunko Michuzi TV

WAFANYANIASHARA 14, waliokuwa wakituhumiwa kuwatumikisha walemavu na kuwafanya ombaomba wamejikuta wakiangua kilio katika mahakama ya Hakimu Mkazi Kisutu baada ya kusikia kuwa Mkurugenzi wa Mashtaka nchini (DPP) hana nia ya kuendelea na mashtaka dhidi yao hivyo wanaachiwa huru.

washtakiwa hao walionekana kama hawaamini kilichotokea na kubakia wakilia kwa uchungu.

Mapema, wakili wa serikali Mwandamizi, Wankyo Simon amedai mbele ya Hakimu Mkazi Mwandamizi Kassian Matembele kuwa kesi hiyo leo Juni 22, 2021 imekuja kwa ajili ya kutajwa lakini DPP amewasilisha hati ya kutokuendelea na mashtaka dhidi ya washtakiwa hao chini ya Kifungu Cha 91 (1) cha Sheria ya Mwenendo wa Makosa ya Jinai (CPA).

Washtakiwa walioachiwa mbele ya Hakimu Mkazi Mwandamizi, Kassian Matembele ni Yusuph Mohamed (35), Yusuph Magadu (20), Emmanuel Salu (20) Gogad Mayenga (18), Samson Taruse (26), Hussein John (18), Zacharia Paul (18), Dotto Shigula (19), Petro Simon (21), Emmanuel Sahani (38), Joseph Mathias (20), Masanja Paul (21), Aminiel Sangu (19), na Emmanuel Lusinge.

Awali washtakiwa hao walikuwa 15, lakini mshtakiwa wa kwanza ambae ni mfanyabiashara Sadikiel Meta (71) aliyekuwa akikabiliwa na mashtaka 41 yakiwemo ya kuwatumikisha walemavu na kuwafanya kuwa omba omba, alifariki dunia na hiyo kubakia watuhumiwa 14.

Taarifa ya kifo cha Meta, ilitolewa na Wakili wake, Robert Langeni, ambapo alidai kuwa mteja wake alifariki Januari 28,2021 katika Hospitali ya Temeke alipokuwa amelazwa.

Katika kesi hiyo washtakiwaban walidaiwa wanashtakiwa walidaiwa kuwatumikisha walemavu na kuwafanya kuwa omba omba, usafirishaji haramu wa binadamu, kutakatisha fedha, kukwepa kulipa kodi na kuisababishia serikali ya Jamhuri ya Muungano wa Tanzania hasara ya Sh. Milioni 31.3

Walidaiwa kutenda kosa hilo kati ya mwaka 2020 na Januari Mosi 2021 jijini Dar es Salaam ambapo kwa pamoja wanadaiwa kushiriki kufanya uhalifu wa kupanga kwa kuongoza genge la uhalifu na kutekeleza kufanikisha kusafirisha binadamu kwa haramu.

Pia katika shtaka la usafirishaji haramu wa binadamu inadaiwa, katika kipindi hicho hicho huko Tandale ndani ya Wilaya ya Kinondoni jijini Dar es Salaam mshtakiwa Meta na Mohamed waliwatumikisha walemavu 37 na kuwafanya wawe omba omba wa mtaani kwa lengo la kujipatia kipato.

Miongoni mwa wa walemavu hao ni mtoto Kashinje Emmanuel, mwenye umri wa miaka saba, Doto Silas Happines Bezagurwa, Neema Edward na Peter Sereke wote wa ama umri wa miaka 11.

llidaiwa kuwa washtakiwa hao pia walikuwa wakisafirisha walemavu kutoka mikoa ya Shinyanga na Tabora kwenda Dar es Salaam na kwamba wakishapokelewa wanawaingiza kwenye shughuli za omba omba kwa lengo la kujipatia faida.