POLAND YAAHIDI KUENDELEZA USHIRIKIANO NA TANZANIA KATIKA KUBORESHA MIRADI YA MIFUGO

 Katibu Mkuu Wizara ya Mifugo na Uvuvi (Mifugo) Prof. Elisante Ole Gabriel (kushoto) akimkabidhi zawadi Naibu Waziri wa mambo ya nje wa Poland, Pawel Jablonsiki muda mfupi baada ya Waziri huyo kutembelea na kukagua maabara za mafunzo zilizopo kwenye taasisi ya Wakala ya Mafunzo ya Mifugo Tanzania (LITA) kampasi ya Tengeru, Arusha leo (22.06.2021), Katikati ni balozi wa Poland nchini, Krzysztof Buzalski.

Naibu Waziri wa mambo ya nje wa Poland, Pawel Jablonsiki (kulia) akimkabidhi zawadi Katibu Mkuu Wizara ya Mifugo na Uvuvi (Mifugo) Prof. Elisante Ole Gabriel muda mfupi baada ya Waziri Jablonsiki kutembelea na kukagua maabara za mafunzo zilizopo kwenye taasisi ya Wakala ya Mafunzo ya Mifugo Tanzania (LITA) kampasi ya Tengeru, Arusha leo (22.06.2021).

 POLAND imefurahishwa na ushirikiano uliopo baina yake na Tanzania ambapo imeahidi  kuendeleza ushirikiano huo ili kuboresha miradi mbalimbali ya maendeleo ikiwemo ile inayohusu sekta ya mifugo nchini.

Hayo yamesemwa leo (22.06.2021) na Naibu Waziri wa mambo ya Nje wa nchi hiyo, Pawel Jablonsiki mara baada ya kufika na kukagua maabara ya uchunguzi wa magonjwa ya mifugo iliyopo kwenye taasisi ya Wakala ya Mafunzo ya Mifugo (LITA) kampasi ya Tengeru iliyopo jijini Arusha.

“Nimefurahishwa sana na kazi kubwa iliyofanyika hapa na nina imani miradi mingine inayotekelezwa kwa ushirikiano baina ya  Tanzania na Poland itaendelea kutekelezwa kwa mafanikio makubwa” Amesema Jablonsiki.

Balozi huyo wa Poland amesema kuwa Uhusiano mzuri uliopo baina ya nchi yake na Poland ndio kitu kikubwa ambacho pande hizo mbili zitaendelea kujivunia daima ambapo ameonesha kutambua na kuthamini mchango wa Tanganyika kwa nchi hiyo wakati wa Vita kuu ya pili ya dunia.

“Ninaomba Katibu Mkuu unifikishie salamu kwa Waziri kwa sababu ninatambua kazi kubwa anayoifanya katika kukuza sekta ya mifugo nchini na sisi kama Poland tutaendelea kutoa ushirikiano wa kutosha katika kutekeleza miradi mbalimbali inayolenga kuboresha sekta hiyo hapa nchini” Ameongeza Jablonsiki.

Kwa upande wake Katibu Mkuu Wizara ya Mifugo na Uvuvi (Mifugo) Prof. Elisante Ole Gabriel ambaye alimwakilisha Waziri wa Mifugo na Uvuvi ameishukuru nchi ya Poland kwa mchango wao katika kukuza sekta ya mifugo nchini ambapo alimuomba Waziri huyo kuihakikishia Serikali ya Poland kuwa Wizara yake ipo tayari kuendelea kushirikiana kwa ukaribu na nchi hiyo.

“Lakini jambo moja ambalo Mhe. waziri wangu amesema nikuombe ni kwamba sasa maabara  zimeshakarabatiwa zikiwa na vifaa vya kisasa hivyo pale ambapo hali ya korona itakapokuwa  nzuri tungependa kuwepo na mpango wa kubadilishana  wanafunzi baina ya Tanzania na Poland” Ameongeza Prof. Ole Gabriel.

Aidha Prof. Ole Gabriel ameainisha kuwa maabara hizo zilizoboreshwa kwa msaada wa nchi ya Poland zitawasaidia wanafunzi kujifunza kwa vitendo kuhusu masuala mbalimbali ya kitaalam yanayohusu mifugo nchini ambapo ameahidi kuitunza miundombinu hiyo ili iweze kutumika kwa muda mrefu zaidi.

Kwa upande wake Mtendaji Mkuu wa Wakala ya Mafunzo ya Mifugo nchini (LITA) Dkt. Pius Mwambene amesema kuwa nchi ya Poland imetoa ufadhili kwenye miradi 6 ya taasisi hiyo ambapo miongoni mwa miradi hiyo ni huo wa uboreshwaji wa maabara za mafunzo za taasisi hiyo kampasi ya Tengeru.

“Mbali na maabara hizo, Wakala ya Mafunzo ya Mifugo nchini (LITA) inatarajiwa kuwa na vituo vitatu vya umahiri ambapo kituo cha Tengeru kitakuwa kikihusiana na masuala ya maziwa, kituo cha Mabuki mkoani Mwanza kitajihusisha na masuala ya nyama na kituo cha Morogoro kitahusiana na masuala ya ngozi” Amesisitiza Dkt. Mwambene.

Wakala ya Mafunzo ya Mifugo Tanzania (LITA) imekuwa ikitoa mafunzo mbalimbali kwa wataalam wa mifugo nchini lengo likiwa ni kuboresha sekta hiyo na kuifanya iendelee kutekelezwa kwa tija.