OMBI LA JPM KWA WATANZANIA BAADA YA KUPOKEA SIMU YA KENYATTA KUHUSU CORONA

Na Said Mwishehe, Michuzi TV

RAIS Dkt. John Magufuli amewaomba Watanzania kushirikiana na wananchi wa Kenya katika kufanya maombi ya siku tatu kuanzia leo kwa ajili ya

kumuomba Mungu ili nchi hiyo iondokane na gonjwa la Corona ambalo

limeendelea kuzitesa nchi mbalimbali duniani ikiwemo nchi hiyo.

Akizungumza leo Oktoba 9, 2020 jijini Dar es Salaam wakati wa mkutano

wake wa kuomba ridhaa ya watanzania ili wamchague tena katika Uchaguzi

Mkuu mwaka huu, Dkt.Magufuli amesema miezi kadhaa iliyopita Tanzania

pamoja na nchi nyingine zilikuwa zinasumbuliwa na Corona.

Amesema kuwa, Tanzania walikaa pamoja chini ya uongozi wa

viongozi wa dini na kisha kumuomba Mungu ili aepushe  gonjwa hilo la

Corona na katika Mungu hakuna linaloshindikana.

"Ugonjwa wa Corona Tanzania umeondoka. Leo asubuhi nilikuwa naongea na

Rais wa Kenya Uhuru Kenyatta naye ameamua  katika kipindi cha siku

tatu kuanzia leo Ijumaa, kesho Jumamosi na Jumapili kumuomba Mungu ili

ugonjwa wa Corona uondoke Kenya.

"Tushirikiane na Wakenya ili ugonjwa wa Corona Kenya uondoke kama

ambavyo Mungu ameuondoa Tanzania, tuna hakika Mungu wetu atatusikia na

gonjwa hilo litaondoka Kenya, Mungu ukimuomba hakuna

kinachoshindikana.

Kwa kukumbusha tu wakati wa janga la Corona likiwa limeshika kasi Rais

Magufuli pamoja na kuwaomba watanzania kuchukua tahadhari zote kama

sehemu ya kukabiliana na ugonjwa huo alitumia nafasi yake kuwaomba

watanzania kwa umoja wao kufanya maombi ya siku tatu kwa ajili ya

kumuomba Mungu kuwapusha na janga hilo, maombi ambayo Mungu amejibu na leo hii Tanzania hakuna Corona.