DKT. MAGUFULI AFICHUA SIRI YA UMUHIMU WA JIJI LA DAR

*Aeleza namna linavyochangia pato la Taifa.

Na Said Mwishehe, Mchuzi TV

MGOMBEA Urais wa Jamhuri ya Muungano wa Tanzania kwa tiketi ya Chama

Cha Mapinduzi(CCM) Dkt.John Magufuli amefichua siri ya umuhimu wa Jiji

la Dar es Salaam ambalo idadi ya watu kwa sasa imefikia milioni sita.

Dkt. Magufuli ametoa siri hiyo leo mbele ya maelfu ya wananchi wa Jiji

la Dar es Salaam ambao wamejitokeza kwenye mkutano wake wa kampeni za

kuomba ridhaa kwa Watanzania ili achaguliwe tena kuongoza nchi kwa

kipindi cha miaka mitano ijayo ambapo ametumia nafasi hiyo kueleza

umuhimu wa Jiji hilo katika kuleta maendeleo ya nchi.

Amefafanua kuwa Jiji la Dar es Salaam ni muhimu sana  nchini kwani

ndilo Jiji lenye idadi kubwa ya watu kuliko maeneo yote nchini

Tanzania.

"Kwa sasa Dar es Salaam kuna watu milioni sita na ifikapo

mwaka 2030 litakuwa na watu milioni 10 na hivyo kulifanya kuwa

miongoni mwa majiji manne makubwa na yenye watu wengi barani Afrika". Ameeleza.

Ameongeza mbali ya kuwa na idadi kubwa ya watu, Jiji la Dar es Salaam

ni lango kuu la biashara nchini kwani linatoa mchango mkubwa

katika kuchangia pato la Taifa na maendeleo kwa ujumla na limekuwa

likiongoza kwa uchangiaji mapato na hasa mapato ya kodi kwa asilimia

90.

Dkt. Magufuli ametumia nafasi hiyo kutoa takwimu za mapato tangu mwaka

2015 hadi mwaka 2020 ambapo kwa mwaka 2016/2017

ilichangia Sh.trilioni 12.6 sawa na asilimia 88.6 na mwaka 2017/2018

ilichangia Sh.trilioni 13.6 sawa na asilimia 89.

Amesema mwaka 2018/2019 Jiji la Dar es Salaam lilichangia mapato ya

Sh.trilioni 13.9 sawa na silimia 88.7 na mwaka 2019/2020 limechangia

Sh.trilioni 16.6 ambayo ni sawa na asilimia 89. 7. Na kwa kipindi cha

miaka mitano Jiji la Dar es Salaam limeendelea kuongoza katika pato la

Taifa.

"Ndugu zangu wana Dar es Salaam, hili ni lango kuu

la uchukuzi na lango la usafirishaji, sio hapa tu nchini bali na nchi

nyingine zinazotuzunguka, nchi yetu inapakana  na nchi nane kati ya hizo

nchi sita hazina bandari.Kwa kuzingatia hayo yote nilipokuja kuomba

kura niliahidi mambo mengi lakini nitataja manne."amesema Dkt.Magufuli

wakati anazungumzia umuhimu wa Jiji hilo.

Amefafanua mwaka 2015 wakati anaomba ridha aliahidi kuimarisha ulinzi

na usalama, kuimarisha miundombonu mbalimbali, kuboresha huduma za

jamii ikiwemo afya, elimu maji na umeme pamoja na ahadi ya nne ilikuwa

ni kuboresha mazingira ya biashara kwa ajili ya wananchi wa Jiji la

Dar es Salaam na Watanzania wote.

"Nashukuru kwa miaka mitano tumeweza kutekeleza ahadi hizo kwa

vitendo, wagombea udiwani na wabunge wamekuwa wakieleza mambo ambayo yametekelezwa.

Wakati tunaingia Dar es Salaam kulikuwa na vitendo vya ujambazi wa kutumia silaha.

"Waliokuwa wanakwenda benki hawakuwa na uhakika wa fedha zao kufika

salama, hali hiyo imedhibitiwa na sio Dar es Salaam tu bali hata

maeneo ya nje ya Jiji hilo yakiwemo ya Kibiti na Mkuranga ambako

waliokuwa wanafanya vitendo hivyo Dar wanakwenda kujificha

huko,"amesema.

Kuhusu ahadi ya miundombinu, Dkt.Magufuli amesema wagombea ubunge

wameeleza mambo mengi yamefanyika, barabara za lami zimejengwa katika

mitaa ya Dar es Salaam  na ukijumlisha barabara za lami ni zaidi ya

kilometa 2000 zimejengwa ambapo kiasi cha Sh.bilioni 660 zimetumika.

Pia amesema barabara nyingine bado zinaendelea kujengwa na fedha

tayari zipo kufanikisha ujenzi huo huku akiamua kumjibu mmoja ya

wagombea urais ambaye amekuwa akieleza barabara ya kutoka Kimara hadi

Kibaha ni pana sana.

"Kwanza sio kweli kule Hoston nchini Marekani kuna

barabara ina njia 26 lakini hata kama kwa mfano ingekuwa ni barabara

yetu ni pana hakuna ubaya." Amesema.

"Sio lazima ili kitu kizuri basi kiwepo Ulaya tu, mbona Mungu aliamua

kutupa mtu wa kwanza hapa Tanzania, hakushangaa kitu, mbona tunao

mlima mrefu hapa kwetu lakini wala hakushangaa, mbona madini ya

Tanzanite yapo Tanzania tu na hata mti mrefu kuliko yote duniani uko

hapa hapa kwetu,"amesema Dkt. Magufuli.