WALENGWA WA TASAF WAIOMBA SERIKALI KUONGEZA FEDHA ZA RUZUKU

Mwezeshaji wa zoezi la uhakiki wa taarifa za kaya maskini kutoka mfuko wa maendeleo ya jamii Tasaf wilaya ya Tunduru mkoani Ruvuma Mbwana Boma kushoto, akipata taarifa kutoka kwa Awetu Kulangwa ambaye ni  mmoja kati ya walengwa wanaopokea ruzuku  ya fedha kutoka Tasaf katika kijiji cha Nakayaya Mashariki wakati wa zoezi la uhakiki wa taarifa za wanufaika wa mpango huo ambapo jumla ya kaya 13,752 zimehakikiwa taarifa zao wilayani Tunduru.

*******************************

Na Mwandishi Wetu,
Tunduru

WAKATI Mfuko wa maendeleo ya jamii Tasaf wilaya ya Tunduru mkoani Ruvuma ukikamilisha zoezi la uhakiki kwa wanufaika wa mpango wa kunusuru kaya maskini,baadhi ya
walengwa wakiwemo walemavu wameiomba Serikali kuongeza kiwango cha fedha ili waweze kukabiliana na changamoto mbalimbali za kimaisha.
Wakizungumza wakati wa zoezi la uhakiki wa kaya maskini katika kipindi cha pili awamu ya tatu katika kijiji cha Nakayaya Mashariki walengwa hao walisema, kiwango kinachotolewa na Serikali kupitia Tasaf  ni kidogo na hakitoshelezi kukidhi mahitaji  muhimu ya kila siku.
John Nchunda na Mohamed Thabit,  wameiomba Serikali kuangalia uwezekano wa kuongeza fedha inazotoa kama ruzuku  ya kaya maskini  kwa kuwa  gharama za maisha kwa sasa  zimepanda,kwa hiyo ni vizuri serikali  ikaangalia suala  hilo.
John Nchunda alisema, licha ya nia njema ya Serikali kuwasaidia watu maskini wanaokabiliwa na changamoto mbalimbali za maisha,hata hivyo haina budi kuangalia upya tena kwa jicho la huruma kutokana na kupanda  kwa gharama.
Naye Aidan Ndumbaro, ameishukuru Serikali kwa kuwakumbuka watu maskini juu ya suala la kutoa fedha za ruzuku ambazo tangu ilipoanza mpango huo zimesaidia sana kubadili hali zao za maisha.
Aidha, ameunga mkono mpango wa kuhakiki upya kaya maskini unaokwenda kuboresha taarifa za walengwa  kwa sababu utamaliza tatizo la ubabaishaji uliokuwa unafanywa na baadhi ya watu  wasiohusika kupokea fedha  zinazotolewa na Serikali kupitia mfuko wa maendeleo ya jamii(Tasaf).
Alisema, zoezi la uhakiki litasaidia kupata walengwa husika na kuondoa malalamiko ya kuwepo kwa watu wanaojinufaisha kupitia mpango huo ambao hawana sifa na hawastahili kuendelea kupokea ruzuku.
Kwa upande wake Mratibu wa Tasaf wilaya ya Tunduru Muhidin Shaibu alisema,lengo la uhakiki huo ni  kuboresha taarifa za  kaya maskini ili kubaini kama zinafanana na taarifa za awali za walengwa hao.
Alisema, katika zoezi hilo lililofanyika kwa kutumia vishikwambi(tablet)kupata taarifa za walengwa,wawezeshaji wamefanikiwa kuzifikia jumla ya kaya 13,751 zilizopo katika mpango wa kunusuru kaya maskini wilayani Tunduru.
Alisema, katika zoezi la uhakiki wanaangalia taarifa za kaya  ili kujiridhisha kama kuna zilizoongezeka ua kupungua,watoto wanaokwenda shule na wanaohudhuria kliniki  ambao wanapata ruzuku ya Serikali.
Alisema,kabla ya kuanza kwa zoezi hilo wawezeshaji ambao ni watumishi wa Serikali  walipewa mafunzo  siku mbili ya kuwajengea uwezo namna ya kupata taarifa na kutumia vishikwambi na walifika katika vijiji 88 vyenye wanufaika kwa ajili ya kufanya uhakiki wa taarifa zao.
Shaibu alisema, zoezi hilo limefanyika kabla ya kuanza upya kutoa fedha za ruzuku kupitia utekelezaji wa  kipindi cha pili cha awamu ya tatu  ya mpango wa kunusuru kaya maskini katika wilaya hiyo.
Alisema, kimsingi uhakiki huo utasaidia  kufanya marekebisho ya taarifa pamoja na kutambua usahihi wa taarifa za walengwa kama ziko sawa sawa kama zilizokusanywa katika awamu  zilizopita.
Alisema, zoezi la uhakiki linalenga kupata taarifa sahihi za walengwa  ambao wataendelea kupokea ruzuku na utamaliza baadhi ya changamoto zilizojitokeza wakati wa utambuzi wa kaya katika awamu zilizopita.