PHAM ACCESS YASHIRIKI MAPAMBANO YA CORONA MANYARA

Mkuu wa Wilaya ya Babati Mkoani Manyara, Elizabeth Kitundu akizungumza baada ya kukabidhiwa barakoa 2,750 na miavuli 27 ya thamani ya shilingi milioni 7 iliyotolewa na shirika la PhamAccess kwa ajili ya kutumiwa na wahudumu wa afya na wanawake wajawazito, kulia ni Katibu Tawala wa Wilaya hiyo Khalifan Matipula na Meneja mradi wa safari salama ya mama mjamzito ‘Momcare’ Johnson Mali.

********************************

SHIRIKA la PhamAccess Foundation, limekabidhi barakoa 2,750 na miavuli 27 ya thamani ya

sh7 milioni Wilaya ya Babati Mkoani Manyara kwa lengo la kuunga mkono mapambano ya kujikinga na maambukizi ya virusi vya corona.

Meneja mradi wa safari salama ya mama mjamzito ‘Momcare’ wa shirika la PhamAccess, Johnson Mali alikabidhi vifaa hivyo jana kwa mkuu wa wilaya ya Babati Elizabeth Kitundu.

Mali alisema kati ya barakoa hizo 2,750 barakoa 1,750 ni kwa ajili ya watoa huduma za afya, barakoa 1,000 zitatumiwa wajawazito na miavuli 27 kwa ajili ya wahudumu waandikishaji wa mfuko wa afya ya jamii ulioboreshwa (iCHIF).

Alisema vifaa hivyo vimetolewa kwa gharama za shirika la PhamAccess kwa ushirikiano wa wafanyakazi wake ambao nao kwa hiyari yao walichanga sehemu ya fedha zao ili kuvinunua katika kupiga vita maambukizi ya virusi vya corona.

“Hizo barakoa 1,000 ambazo zitatumiwa na wanawake wajawazito zimetokana na michango ya wafanyakazi wa shirika letu la PhamAccess kama mchango wao kwa jamii katika mapambano ya virusi vya corona,” alisema.

Alisema hii ni mara ya pili kwa shirika hilo la PhamAccess, kutoa msaada wa vifaa mbalimbali ya kujikinga na maambukizi ya virusi vya corona kwani mara ya kwanza walitoa kwenye ngazi ya mkoa wa Manyara.

“Tumetoa msaada wa vifaa hivi huku tukiendelea kuboresha vituo vyetu kwa ajili ya kuboresha upatikanaji wa huduma za afya kwa wananchi na usalama wa mgonjwa na watoa huduma,” alisema Mali.

Alisema wamekuwa wakitoa mafunzo kwa watumishi vituoni na kutoa miongozo na vifaa tiba kwa lengo la kuhakikisha mwanamke ananufaika.

Mkuu wa wilaya ya Babati, Elizabeth Kitundu aliwapongeza wafanyakazi wa shirika la PhamAccess kwa kufanikisha ununuzi wa vifaa hivyo ambavyo kwa namna moja au nyingine zitasaidia mapambano hayo.

Kitundu aliwataka wadau wengine kuiga mfano wa jitihada za PhamAccess katika kusaidiana na serikali katika vita hiyo ya kupambana na maambukizi ya virusi vya corona.

“Hii ni mara yenu ya pili ya kutoa msaada wa vifaa kama hivi mara ya kwanza mlitoka kwenye ngazi ya mkoa na leo mmetoa katika ngazi ya wilaya ya Babati, hongereni sana, tunawashukuru mno kwa kujali,” alisema.

Mtumishi wa idara ya afya wa hospitali ya mji wa Babati, Gabriel Sulle alisema kwa niaba ya uongozi wa halmashauri ya mji anawashukuru PhamAccess kwa kutoa vifaa hivyo.

“Vifaa hivyo tutatolewa kwa watumishi wa hospitali ya mji, vituo vya afya na zahanati mbalimbali katika halmashauri mbili za wilaya na mji wa Babati kama mlivyoelekeza,” alisema Sulle.