SERIKALI YATOA MIL 240 KWA AJILI YA MAABARA ZA SEKONDARI CHALINZE

……………………………………………………………………………………

NA MWAMVUA MWINYI, Chalinze

SERIKALI Kuu imetoa kiasi cha sh.milioni 240 ,kwa ajili ya kumalizia maabara nane katika za sekondari kwenye halmashauri ya Chalinze, wilaya ya Bagamoyo Mkoa wa Pwani .

Fedha hizo zitatokana na bajeti ya mwaka wa 2020/2021, zinalenga kujenga vyumba hivyo katika shule 9 za sekondari, ambapo kila chumba kimoja kitatumia sh.milioni 30. 

Kaimu Ofisa Elimu Sekondari Halmashauri ya Chalinze, Irene Joseph aliiambia Kamati ya Siasa ya Halmashauri Kuu ya (CCM) Wilayani Bagamoyo, chini ya Mwenyekiti wa Chama Cha Mapinduzi (CCM) alhaj Abdul Sharifu,

ilipokwenda kujionea ujenzi unavyoendelea katika shule mpya ya msingi ya Kwamkomba, Kata ya Mioni kuwa ,lengo kuwawezesha wanafunzi kujipatia fursa ya kujisomea masomo ya sayansi.

“Katika mwaka wa fedha wa 2020/2021 tunataraji kupokea kiasi cha sh.milioni 240 zitazomalizia chumba kimoja kimoja, katika majengo ya maabara nane kati ya tisa kwenye shule zetu za Sekondari zilizopo ndani ya Halmashauri yetu,” alisema Irene.

Wakichangia mada katika ujenzi wa shule hiyo shikizi, wajumbe Ally Ally, Alhaj Amir Mkang’ata na Yahya Msonde walimtaka Ofisa Elimu Msingi vifaa na Takwimu Pilli Kinunga kuwasiliana na Mkurugenzi Mtendaji, ili wanaohusika na usajili wafike hatimae waipatie usajili shule hiyo kwani inakidhi vigezo.

“Hii shule ni ya Serikali inaonekana inakidhi vigezo, hivyo nikushauri Ofisa Elimu wasiliana na Mkurugenzi ili wanaohusika na usajili wa shule hii wakamilishe taratibu hatimae ianze kupokea wanafunzi, angalia mabati yameshaanza kuchakaa,” alisema Ally.

Mwenyekiti wa (CCM) Wilaya Sharifu aliwataka wataalamu wanaoandaa taarifa za miradi katika naeneo yao, wasisahau kuandika nguvu zinazotolewa na wananchi, kwani kutoiweka kwenye taarifa zao ni kuwavunja nguvu.

Awali Mwalimu Mkuu wa shule ya Msingi ya Kikalo Mdachi Mnyani, anayesimamia ujenzi huo alielezea, katika majengo mapya ilitakiwa kuongezwa chumba kimoja cha darasa, lakini yamejenga vitatu.