MAOFISA WAANDIKISHAJI ,WASAIDIZI MKOANI PWANI WAFUNDWA KUFUATA MIIKO NA SHERIA -LONGWAY

NA MWAMVUA MWINYI,PWANI

MAOFISA waandikishaji,waandikishaji wasaidizi pamoja na maofisa uchaguzi wa halmashauri na TEHAMA mkoa wa Pwani wameaswa ,kufuata miiko na sheria zilizo chini ya Tume wakati wa utekelezaji wa zoezi la uboreshaji daftari la kudumu la wapiga kura ,linalotarajiwa kuanza februari 14 na kukamilika februari 20 mwaka huu.

Pamoja na hayo, mawakala wa vyama vya siasa wataruhusiwa kuwepo katika vituo vya kuandikisha wapiga kura ,Jambo ambalo litaleta uwazi ila hawatakiwi kuwaingilia watendaji hao wanapotekeleza wajibu wao .

Akifungua semina ya mafunzo ya uandikishaji mkoani Pwani, ambayo ni ya siku moja ,kamishna wa Tume ya Taifa ya uchaguzi ,Jaji mstaafu Longway Mary Harriet Chibibi, alisema endapo atatokea ofisa atakaekiuka sheria zilizopo atachukuliwa hatua kulingana na matakwa ya sheria iliyopo.

Alitoa wito, kuzingatia maelekezo yanayotolewa na Tume hiyo ili waweze kufanya kazi zao ipasavyo wakati wa zoezi hilo.

Alisema ,mafunzo haya ya jinsi ya kutumia mfumo wa uandikishaji yanalenga kuwawezesha maofisa waandikishaji na maofisa waandikishaji wasaidizi ngazi ya jimbo,TEHAMA kupata uelewa wa jinsi ya kutumia kwa ufasaha BVR kit kwa ajili ya uboreshaji wa daftari “:

“Na wao waweze kutoa mafunzo hayo kwa maofisa waandikishaji wasaidizi ngazi ya kata ambao nao watatoa mafunzo hayo kwa BVR kit -operators na waandishi wasaidizi ambao ndio watahusika na uandikishaji wa wapiga kura vituoni.”:alifafanua Longway.

Nae mratibu wa uandikishaji mkoani Pwani, Gerald Mbosoli aliwahakikishia wananchi kuwa mkoa umejipanga kufikia maeneo yote lengwa hadi maeneo yasiofikika kirahisi ikiwemo kisiwa cha Mafia na Delta huko Rufiji.

Mshiriki wa mafunzo hayo ambae pia ni ofisa mwandikishaji wa halmashauri ya Mji wa Kibaha ,Jennifer Omolo alieleza, halmashauri hiyo ina mitaa 73,na vituo 122 hivyo watahakikisha vituo vyote vinapata waandikishaji