Sera Mpya ya Maendeleo ya Vijana Kutatua Changamoto za Vijana

Naibu Waziri, Ofisi ya Waziri Mkuu, Kazi, Vijana na Ajira Mhe. Anthony Mavunde (Mb) akizungumza na wadau wa maendeleo ya vijana walipokuta kujadili Sera ya Taifa ya Maendeleo ya Vijana hii leo Novemba 30, 2018, Kilimani Landmark, Jijini Dodoma.

Katibu Mkuu wa Ofisi hiyo Bw. Andrew Massawe akielezea jambo kwa wadau wa Maendeleo ya Vijana walioshiriki Mkutano huo uliofanyika Jijini Dodoma.

Naibu Waziri, Ofisi ya Waziri Mkuu, Kazi, Vijana na Ajira Mhe. Anthony Mavunde akiteta jambo na Mkurugenzi wa Maendeleo ya Vijana Bw. James Kajugusi akifafanua jambo kwa wadau wakati wa mkutano huo.

Mwakilishi kutoka Wizara ya Ardhi, Nyumba na Maendeleo ya Makazi Bw. Alex Rutta akielezea jambo wakati wa mkutano huo

Baadhi ya wadau wa maendeleo ya vijana wakimsikiliza Naibu Waziri, Ofisi ya Waziri Mkuu, Kazi, Vijana na Ajira Mhe. Anthony Mavunde (hayupo pichani) wakati wa mkutano wa majadiliano ya rasimu ya Sera ya Taifa ya Maendeleo ya Vijana.

Katibu Mkuu UNA Tanzania Bw. Reynald Maeda akichangia hoja wakati wa mkutano huo

Baadhi ya wadau wa maendeleo ya vijana wakijadiliana kwa pamoja juu ya namna bora ya kuboresha rasimu ya sera ya maendeleo ya vijana.

Katibu Mkuu wa Ofisi hiyo Bw. Andrew Massawe akizungumza jambo na mmoja wa wadau wa maendeleo ya vijana mara baada ya kufungua mkutano huo. (Kulia) ni Mkurugenzi wa Maendeleo ya Vijana Bw. James Kajugusi.

Naibu Waziri, Ofisi ya Waziri Mkuu, Kazi, Vijana na Ajira Mhe. Anthony Mavunde akiwa kwenye picha ya pamoja na wadau wa maendeleo ya vijana ikiwemo Wizara za kisekta, Idara za Serikali, Taasisi za Umoja wa Mataifa, Asasi za kirai, Vyama vya Siasa vyenye sajili, Taasisi za dini na Vyuo vya elimu ya juu na kati walipokuta kujadili Sera ya Taifa ya Maendeleo ya Vijana.

PICHA ZOTE NA OFISI YA WAZIRI MKUU

KAZI, VIJANA, AJIRA NA WENYE ULEMAVU

…………………….

Na Mwandishi Wetu,Dodoma

Sera  ya  Maendeleo ya Vijana ya mwaka 2007 itakayofanyiwa marekebisho hivi  karibuni inategemewa kutatua changamoto mbalimbali zinazowakabili vijana hasa katika jitihada za

kuwawezesha kujitegemea.

Hayo yamezungumzwa leo jijini Dodoma na Naibu Waziri , Ofisi ya Waziri Mkuu, Kazi,Vijana na Ajira,Anthony Mavunde alipokuwa akifungua majadiliano ya wadau wa vijana juu ya Rasimu ya Sera Mpya ya Maendeleo ya Vijana.

Mavunde amesema kuwa maendeleo na ustawi wa vijana nchini ni jambo la muhimu hivyo lazima kuwe na Sera bora inayotoa muongozo kwa ajili ya utekelezaji wa mipango na mikakati mbalimbali ya vijana.

“Sera hii itatoa dira yenye muelekeo wa kuhakikisha Taifa linakua na vijana wenye nguvu, uwezo na ari ya kushiriki katika nyanja za kimaendeleo zitazokuza uchumi wa nchi hivyo wajibu mkubwa wa Serikali ni kuweka mazingira wezeshi kwa kuandaa sera shirikishi, mikakati inayotekelezeka na sheria ambayo ni rafiki kwa maendeleo ya vijana”, alisema Mavunde.

Mavunde ameongeza kuwa Sera hiyo itajenga msingi mkubwa katika utekelezaji wa Dira ya Taifa ya mwaka 2020 hadi 2025 ambapo malengo yake makubwa ni kuifanya Tanzania kuwa nchi ya uchumi wa kati kupitia viwanda ikiwa ni falsafa inayosisitizwa na Serikali ya Awamu ya Tano.

Amefafanua kuwa hakuna nchi yoyote Duniani ambayo itaweza kupiga hatua kubwa ya maendeleo kama haitawekeza kwenye kundi kubwa la vijana na ndio maana Serikali imeona umuhimu wa kupitia upya sera hiyo kulingana na matakwa ya Dunia.

Kwa upande wake Katibu Mkuu wa ofisi hiyo, Andrew Massawe amesema kuwa lengo la kufanya mkutano huo ni kuwawezesha wadau wa maendeleo ya vijana nchini kutoa maoni ya pamoja na mkakati wa utekelezaji wa sera hiyo.

“Sera hiyo mpya itawasaidia vijana kwenda sambamba na mabadiliko mbalimbali yanayotokea yakiwemo ya kisera na kijamii ili waweze kuendana na ulimwengu wa sayansi na teknolojia”, alisema Massawe.

Zoezi hilo la ukusanyaji maoni juu ya urekebishaji wa sera hiyo ulianza tangu mwaka 2015 ambapo wadau mbalimbali nchini wakiwemo wa Asasi za ndani na za kimataifa,Wizara na Taasisi mbalimbali, Vyama vya Siasa na Viongozi wa dini.