MAKAMU WA PILI ZANZIBAR AAGIZA USIMAMIZI WA MASHINE MAALUMU HOSPITALI YA KASKAZINI A

Makamu wa Pili wa Rais wa Zanzibar Mhe. Hemed Suleiman Abdulla akisalimiana na Wananchi waliofika Hospitali ya Wilaya Kaskazini A iliyopo Kivunge kupata huduma za Afya baada ya kufanya ziara ya ghafla.

MAKAMU wa Pili wa Rais wa Zanzibar Mheshimiwa Hemed Suleiman Abdulla amemuagiza Mkuu wa Mkoa wa Kaskazini Unguja kufuatilia

Makubaliano yaliyopo baina ya Kampuni ya Pyramid iliyoko Dar es salaam na Taasisi ya Hipsi ya Zanzibar juu ya usimamizi wa Mashine Maalum ya uchunguzi wa Maabara iliyowekwa kutoa huduma katika Hospitali ya Wilaya ya Kaskazini A iliyopo Kivunge.

Agizo hilo la Mheshimiwa Hemed Suleiman alilolitoa wakati wa

ziara ya ghafla katika Hospitali hiyo na kuangalia uwajibikaji wa

Watendaji wa Hospitali hiyo pamoja na huduma za Afya wanazopata

Wananchi, na hilo limekuja kufuatia Mashine hiyo kutofanya kazi kwa tatizo la

kuungua kwa Taa wakati bado iko kwenye dhamana ya Kampuni hiyo.

Amemtaka Mkurugenzi Mkuu wa Taasisi ya Hipsi iliyoshirikiana na

Kampuni hiyo ya Pyramid kutoa mrejesho wa taarifa ndani ya masaa Kumi

na Mbili na kupelekewa kwa Mkuu wa Mkoa Kaskazini na baadaye

kuwasilishwa kwake kwa hatua zitazostahiki.

 Hemed alisema licha ya kwamba  Taifa limekuwa likipokea

misaada na baadhi ya michango kutoka kwa Wafadhili na Taasisi za

Kitaifa na Kimataifa kwa ajili ya huduma za Jamii lakini Serikali

haitaridhia kuona Wananchi wake wanaendelea kukosa huduma  za Afya kwa

dharau za Mtendaji mmoja.

Alisema Serikali italazimika kufuatilia mazingira halisi ya huduma za

Maabara za Hospitali hiyo na pale itakapohisi kwamba wale waliopewa

jukumu la kutoa huduma hizo hawako makini haitasita kuachana nao na

badala yake italazimika kununua Mashine nyingine.

Akizungumzia huduma za damu salama, Makamu wa Pili wa Rais wa Zanzibar

aliwataka Watendaji wa Kitengo cha Damu salama kwenye Hospitali hiyo

ya Wilaya  kutobweteka kwa kusubiri Wananchi kuchangia Huduma hiyo

inayohitaji Elimu na uhamasishaji mkubwa.

Mheshimiwa Hemed alisema Watendaji wa Kitengo hicho wanapaswa kutoa

Taarifa kwa Wakuu wa Wilaya na Mkoa kwani wao tayari wana uzoefu

mkubwa katika shughuli za uhamasishaji wa uchangiaji damu wanazokuwa

wakizitekeleza kila Mwaka.

Alisema inasikitisha kuona Kitengo cha Damu salama cha Hospitali hiyo

imekusanya uzito wa Uniti Nne tokea kianze kutoa huduma Mwezi Mmoja

uliopita wakati hata robo ya mahitaji halisi ya matumizi ya huduma

hiyo kwa Wagonjwa haijakidhi.

Akisalimiana na Wananchi waliofika Hospitali hiyo kupata huduma za

Afya Makamu wa Pili wa Rais wa Zanzibar Mh. Hemed Suleiman

aliwahakikishia Wananchi hao kwamba Serikali Kuu imejizatiti katika

kuona huduma za Afya zinawafikia popote walipo.

Mheshimiwa Hemed alisema changamoto zinazowapata Wananchi wakati wa

huduma hizo ikiwemo baadhi ya ukosefu wa Dawa wanazoandikiwa na

Dakatari zitatafutia njia ya kuziondosha kwa Vile Serikali bado

inaendelea na Sera zake za kutoa Matibabu Bure.

Alisema zipo baadhi ya Dawa ambayo matumizi yake kwa Wagonjwa

hufanyika kwa nadra na zina gharama kubwa lakini hicho hakitakuwa

kikwao isipokuwa utaratibu maalum utaandaliwa kupitia Bohari Kuu ya

Dawa Zanzibar ili kuona pale Mgonjwa anapohitaji kupatiwa Dawa hizo

inawezekana.

Mapema Daktari Dhamana wa Hospitali ya Wilaya ya Kaskazini A iliyopo

Kivunge Dr. Tamimu Said Hamad alisema huduma za Afya katika Hospitali

hiyo zimeimarika kiasi kwamba hata malalamiko ya baadhi ya Wagonjwa

yanaendelea kupungua siku hadi siku.

Dr. Tamimu alisema zipo changamoto za kubanduka kwa paa na kupasuka

kwa baadhi ya kuta na Vyumba vya jengo jipya la Hospitali hiyo jambo

lililowatia hofu hasa kwenye vyumba wanavyolazwa wagonjwa wanaopatiwa

huduma za Afya.

Alisema Jengo hilo Jipya lililokabidhiwa Serikalini baada ya kumaliza

Ujenzi wake Mnamo Mwezi Aprili Mwaka huu, limezinduliwa  Rasmi kwa

ajili ya kutoa huduma za  afya Mwezi Oktoba Mwaka huu.

Nao kwa upande wao baadhi ya Wananchi waliofika kupata huduma za Afya

Hosptalini hapo wamemueleza Makamu wa Pili wa Rais wa Zanzibar jinsi

wanavyoendelea kupata faraja kutokana na huduma wanazopata jambo

linalowatia moyo.

Hata hivyo Wananchi hao waliishauri Serikali kuendelea kufuatilia

huduma za Afya zinazotolewa na baadhi ya Hospitali Nchini ambapo wapo

baadhi ya Watendaji wanaendelea kuwasumbuwa Wagonjwa.

Walisema usumbufu huo mara nyingi hutokea 112 na pale mgonjwa

anapotakiwa kufanya vipimo kutokana na mradhi yanayomsumbua inakuwa

mtihani mkubwa jinsi anavyozunguusha hadi kukata tamaa.