BODI YA BONDE LA WAMI-RUVU YAENDELEA NA ZOEZI LA KUSAJILI WATUMIAJI WA MAJI

fisa Maji wa Bodi ya Bonde la Wami-Ruvu, Simon Ngonyani akizungumza na waandishi wa habari katika ofisi za bodi hiyo leo Jijini Dar es salaam.

**************************************

NA EMMANUEL MBATILO, DAR ES SALAAM

Bodi ya Bonde la Wami-Ruvu wataendelea na zoezi la utambuzi wa watumiaji wa maji kwa kuwasajili ili ifikapo Februari 2021 waweze kuwa na namba ya uhakika ya watumiaji wa maji hapa nchini.

Akizungumza na waandishi wa habari Jijini Dar es Salaam, Afisa Maji wa bodi hiyo Simon Ngonyani amesema katika kuendelea kulinda rasilimali za maji bonde la Wami-Ruvu wamekubaliana na wadau wo wa shirika la watu wenye Viwanda (CTI), makampuni na taasisi mbalimbali kufunga mita ili kupata kiwango sahihi cha maji wanachotumia.

“Zoezi hili litaanza kwa wadau wenye viwanda, hii yote ni katika kujua matumizi halisi ya maji hapa nchini yalivyo ili itusaidie kupanga mipango ya watumia maji vizuri”. Amesema Ngonyani.

Aidha Ngonyani amesema mabadiliko ya tabia nchi yanapelekea vyanzo vya maji kuwa hatarini kupungua uwezo wake kwa kiasi kikubwa.

Hata hivyo amesema wamekuwa wakilazimika kuleta mbadala wa shughuli za kibinadamu ambazo haziathiri vyanzo vya maji kama upandaji wa miti ya matunda kwenye vyanzo vya maji.

Pamoja na hayo amewataka watumiaji wa visima vya maji vya kibiashara na sio matumizi ya nyumbani kulipa ada zao kulingana na matumizi (kwa wenye vibali) na wasio na vibali wanatakiwa kufika ofisini kwa ajili ya kupata utaratibu wa kupata vibali.