ECLAT FOUNDATION WAJENGA SHULE NA KUTATUA TATIZO LA WATOTO KUSOMA CHINI YA MITI

Mwenyekiti wa shirika la ECLAT Foundation, Peter Toima akizungumza baada ya kuikabidhi Serikali madarasa manne ya shule ya msingi Mazinde Toima ya Kijiji cha Loiborsoit B.

Mwalimu wa shule shikizi ya Mazinde Kata ya Loiborsoit Wilayani Simanjiro Mkoani Manyara, Kaika Elias akiwaonyesha wageni namna alivyokuwa anawafundisha watoto chini ya mti kabla ya shirika la ECLAT Foundation kukabidhi madarasa manne.

Mkuu wa Wilaya ya Simanjiro Mkoani Manyara, mhandisi Zephania Chaula akiwapungia mkono wanafunzi wa shule shikizi ya Mazinde Kata ya Loiborsoit baada ya kuzindua madarasa manne yaliyojengwa na shirika la ECLAT Foundation, awali wanafunzi hao walikuwa wanasomea chini ya miti, kulia ni Mkurugenzi wa shirika la Upendo Dk Fred Heimbach.

****************************

WANAFUNZI 306 wa chekechea, darasa la kwanza na la pili wa shule shikizi ya Mazinde Kata ya Loiborsoit, Wilayani Simanjiro Mkoani Manyara, waliokuwa wanasomea chini ya miti

wameondokana na adha hiyo baada ya shirika la ECLAT Foundation kujenga madarasa manne, matundu 16 na ofisi ya walimu.

Awali, wanafunzi wa eneo hilo wanaosoma elimu ya msingi inawalazimu kutembelea umbali wa kilomita 16 hadi shule ya msingi Loiborsoit A na kilomita 17 mpaka shule ya msingi Ruvu Remit.

Mwenyekiti wa ECLAT Foundation, Peter Toima akizungumza jana wakati akikabidhi shule hiyo kwa mkuu wa wilaya hiyo Zephania Chaula alisema walichukua hatua hiyo baada ya uongozi wa kijiji hicho kufikisha kwao tatizo hilo.

Toima alisema shirika la ECLAT Foundation kwa kushirikiana na taasisi ya Upendo ya Ujerumani wamefanikisha ujenzi wa madarasa manne matundu 16 ya vyoo na ofisi mbili za walimu.

“Japokuwa katika hayo madarasa manne wananchi walianza kujenga mawili ambayo hayakukamilika hivyo sisi tuliyamalizia kwa gharama zetu,” alisema.

Hata hivyo, mkuu wa wilaya ya Simanjiro Zephania Chaula aliupongeza uongozi wa ECLAT Foundation kwa kufanikisha ujenzi huo kwani utapunguza adha ya wanafunzi kutembelea umbali mrefu wa kwenda shule na kurudi nyumbani.

Alitoa onyo kwa baadhi ya wanasiasa wa wilaya hiyo wanaozusha maneno potofu dhidi ya shirika la ECLAT Foundation kwani wameandikishana mkataba na halmashauri ya wilaya hiyo.

“Wanasiasa uchwara waache maneno nitawachukulia hatua kali kama na wewe unataka kusifiwa fanya mambo ya maendeleo tutakusifia na wewe siyo kusababisha maneno ya uchochezi yasiyo na maana,” alisema.

Ofisa elimu ya msingi wa halmashauri ya wilaya ya Simanjiro, Silvanus Tairo alisema shule hiyo itasajiliwa hivi karibuni kwa jina la shule ya msingi Mazinde Toima na kuondokana na shule shikizi.

Mwalimu wa shule hiyo Kaika Elias alisema wanafunzi wote 306 alikuwa anawafundisha peke yake kwani mwalimu aliyekuwa anashirikiana naye aliondoka eneo hilo.

Mwalimu Elias alimshukuru Toima kwa kujenga shule hiyo kwani wanafunzi walikuwa wanatembea umbali mrefu kwenda kusoma shule za jirani.

Mwanafunzi wa darasa la kwanza Samwel Alamayani alimshukuru Toima kwa kujenga madarasa hayo kwani walikuwa wanasoma chini ya miti hivyo upepo vumbi na mvua zilikuwa kikwazo kwao.

Mwanafunzi wa darasa la pili Rachel Elia alisema baada ya shule hiyo kujengwa hawatakwenda zaidi ya kilomita 32 kwenda shule za jirani na kurudi nyumbani kila siku.