MAMIA WAFURIKA BANDA LA TANESCO VIWANJA VYA NYAKABINDI, MKOANI SIMIYU KUPATA ELIMU KUHUSU MATUMIZI BORA NA SAHIHI YA UMEME

 Fundi Mchundo wa TANESCO Leah Sostheness akitoa elimu kwa wananchi waliotembeela banda la TANESCO kwenye maonesho ya Nanenane kitaifa viwanja vya Nyakabindi nje kidogo ya mji wa Bariadi Mkoani Simiyu leo Agosti 2, 2019.

 Wananchi wakipata elimu kuhusu matumizi bora na sahihi ya umeme kutoka kwa watalamu wa TANESCO viwanja vya Nykabindi nje kidogo ya mji wa Bariadi Mkoani Simiyu Agosti 2, 2019.

 Afisa Masoko wa TANESCO, Adelina E. Lyakurwa (wapili kulia) na na Afisa Uhusiano na Elimu kwa Umma wa Shirika hilo Mkoa wa Simiyu, Bw. Ben Kirumbo, wakiwahudumia wananchi

 Fundi Mchundo wa TANESCO Leah Sostheness, akitoa elimu kwa wanafunzi

 Afisa Uhusiano TANESCO Makao Makuu, Bi. Samia Chande (kushoto), akitoa elimu kuhusu shughuli mbalimbali za TANESCO 

NA K-VIS BLOG/Khalfan Said, Simiyu

MAMIA ya wananchi wakiwemo wanafunzi wa shule za sekondari Mkoani Simiyu na mikoa jirani, wamefurika kwenye banda la Shirika la Umeme Nchini TANESCO kwenye maonesho ya Nanenane viwanja vya Nyakabindi nje kidogo ya Mji wa Bariadi Mkoani Simiyu ili kupata elimu kuhusu matumizi bora na sahihi ya umeme.

Wananchi hususan wanafunzi wa shule za sekondari waliweza kuuliza maswali mbalimbali kuhusu Shirika la Umeme ikiwa ni pamoja na kazi za shirika hilo, ambapo maafisa wa TANESCO waliokuwa kwenye banda hilo walitoa ufafanuzi kuhusu maswali hayo ikiwa ni pamoja na kuwaeleza kuwa kazi za TANESCO ni Kuzalisha, Kusafirisha na Kusambaza Umeme. 

Pia wananchi walipata fursa ya kujifunza matumizi sahihi ya umeme, ikiwa ni pamoja na kuchukua tahadhari umeme unapokatika ambapo walielezwa kuwa ni vema kuzima vifaa vyote vinavyotumia umeme pindi umeme unapokatika, na viwashwe tu pale umeme unaporudi.

Wananchi pia walielezwa miradi mbalimbali ya TANESCO inayotekelezwa na Shirika hilo kwa niaba ya Serikali ambapo walielezwa miongoni mwa miradi hiyo midogo na mikubwa ni kama ule uliozinduliwa hivi majuzi na Rais wa Jamhuri ya Muungano wa Tanzania Dkt. John Pombe Magufuli wa ujenzi wa mradi mkubwa wa umeme wa mto Rufiji (Bwawa la Nyerere) mkoani Pwani ambapo utakapokamilika ujenzi wake mwaka 2022 utazalisha umeme Megawati  2115.

Maonesho hayo ambayo yanafanyika kitaifa mkoani Simiyu yalizinduliwa Agosti 1, 2019 na Makamu wa Rais wa Jamhuri ya Muungano wa Tanzania Mhe. Samia Suluhu Hassan na kauli mbiu ni "Kilimo, Mifugo na Uvuvi kwa ukuaji wa Uchumi wa Nchi". Maonesho hayo yatafikia kilele Agosti 8, 2019.