MKANDARASI APEWA SIKU 7 MRADI UTOE MAJI

Waziri wa Maji, Mhe. Profesa Makame Mbarawa akiwa kwenye moja ya eneo la Mradi wa Maji wa Kapapa, Halmashauri ya Busokelo mkoani Mbeya.

Waziri wa Maji, Mhe. Profesa Makame Mbarawa (aliyeshika kiuno) akikagua kazi ya kuunganisha mabomba akiwa na Mkurigenzi Mtendaji wa Kampuni ya Leostarf Engineering Ltd, Mhandisi Johannes Mgosi waliopewa kandarasi ya ujenzi wa Mradi wa Maji wa Kapapa uliopo katika Halmashauri ya Busokelo, mkoani Mbeya.

Sehemu ya chanzo kipya cha maji kwa ajili ya Mradi wa Maji wa Kapapa kikiwa kimekamilika.

Waziri wa Maji, Mhe. Profesa Makame Mbarawa akitoka kukagua ya ujenzi wa Mradi wa Maji wa Chunya Mjini uliokamilika katika Halmashauri ya Chunya, mkoani Mbeya.

Waziri wa Maji, Mhe. Profesa Makame Mbarawa (katikati) pamoja na Meneja Ufundi wa Mbeya UWASA, Mhandisi Ndele Mengo (kushoto) akiwa juu ya tenki la Mradi wa Maji wa Chunya Mjini uliokamilika katika Halmashauri ya Chunya, mkoani Mbeya.

………………………….

Waziri wa Maji, Mhe. Profesa Makame Mbarawa amempa siku 7 mkandarasi kukamilisha

kazi ya ujenzi wa Mradi wa Maji wa Kapapa uliopo kwenye Halmashauri ya Busokelo, mkoani Mbeya.

Profesa Mbarawa ametoa maagizo hayo mara baada ya kutembelea mradi huo kutokana na ujenzi wake kuchelewa tangu uanze mwaka 2014.

Amesema nimekuwa sifurahishwi na mradi huu wa maji kutokutoa huduma ya maji kwa wananchi na kusababisha adha kubwa kwao.

Tatizo la mradi huu ilikuwa ni usanifu mbovu wa chanzo hapo awali, jambo lililosababisha maji kutofika kwenye miundombinu na kuyasambaza kwa wananchi.

Tukachukua hatua ya kumfukuza mkandarasi na kuwakabidhi Mamlaka ya Majisafi na Usafi wa Mazingira Mbeya Mjini (Mbeya UWASA), ambao walimtafuta mkandarasi mwingine Kampuni ya Leostarf Engineering Ltd na kufanya kazi ya ujenzi wa chanzo kipya na hivi sasa amebakiza hatua ya kuunganisha mabomba 65 ya chuma kwenye maeno yenye makorongo na kuunganisha kwenye mtandao wa wateja.

Kwa ujumla kazi inaenda vizuri na namuagiza mkandarasi aongeze nguvu kazi, ili kila mmoja afanye kazi katika kipande chake na baada ya siku 7 wakazi vijiji 8 waanze kupata huduma ya maji.

Meneja Ufundi wa Mbeya UWASA, Mhandisi Ndele Mengo amesema mradi huo utanufaisha wakazi 31,000 wa vijiji 8 vilivyopo katika Halmashauri ya Kyela.

Katika wakati tofauti, Waziri wa Maji, Mhe. Profesa Makame Mbarawa amefurahishwa na kukamilika kwa Mradi wa Maji wa Chunya Mjini na kusema mradi huo utaleta mageuzi makubwa kwa mji huo.

Amesema mji huo umekuwa na changamoto kubwa ya upatikanaji wa huduma ya maji na kukamilika kwa mradi huo kumempa faraja kubwa.

Kumekuwa na hitilafu ya kiungo cha bomba kuachia, hali iliyosababisha maji kutotoka. Lakini mpaka sasa mafundi wanaendelea na ukarabati na baadhi ya maeneo yameshaanza kupata maji na baada siku chache maji yatakuwa yanatoka maeneo yote yanayohudumiwa na mradi amesisitiza Profesa Mbarawa.

Mradi wa Chunya Mjini utahudumia wakazi 15,000.