WALIMU WALIOHAMISHIWA S/MSINGI CHALINZE WALILIA FEDHA ZA UHAMISHO MIL.184.5

Baadhi wa walimu wa Shule za Sekondari wa Halmashauri ya Chalinze wilayani Bagamoyo mkoani Pwani waliohamishiwa shule za msingi ikiwa ni vituo vyao vipya ,wakiwa nje ya ofisi ya halmashauri hiyo ,kupata majibu ya madai yao.

Picha na Mwamvua Mwinyi

……………..

Na Mwamvua Mwinyi,Chalinze

WALIMU 167 wa Shule za Sekondari wa Halmashauri ya Chalinze wilayani Bagamoyo mkoani Pwani waliohamishiwa shule za msingi ikiwa ni vituo vyao vipya wanadai kiasi cha sh. milioni 184.5 kwa ajili ya uhamisho.

Wakizungumza na waandishi wa habari kwenye ofisi za Halmashauri zilizopo Lugoba walimu hao walisema walipata wakati mgumu na kushindwa kuripoti kwenye vituo vipya vya kazi

kutokana na changamoto hiyo.

Moja ya walimu aliyejitambulisha kwa jina la Elisia Musa ,alieleza baada ya zoezi hilo kushindikana kutokana na uhaba wa fedha waliporudi kwenye vituo vyao vya zamani hawakupokelewa hali iliyowasababishia kuwa katika hali ya sintofahamu.

“Kutokana na kutopokelewa kwenye vituo vyetu vya mwanzo tuliiomba halmashauri itupe barua ili iweze kupokelewa kwenye vituo vyetu vya zamani wakati tukisubiri fedha kwenda kwenye vituo hivyo vipya” alisema Musa.

Musa alisema, wakilipwa stahiki zao watakwenda kwenye vituo vipya vya kazi.

Mkurugenzi wa Halmashauri ya Chalinze Edes Lukoa alielezea, walitekeleza agizo la serikali kwa kuzingatia kanuni na sheria .

Alisema walikuwa na zidio la walimu 167 wa sanaa shule za sekondari ambao walipaswa kuhamishiwa shule za msingi.

Lukoa alibainisha ,baada ya kutoa barua walimu walikumbwa athari za kisaikolojia wakawa na uzito kwenda kwenye vituo vyao vipya yaani kwenye shule za msingi  kutokana na kujiona kuwa ni kwanini watoke shule za sekondari wakafundishe shule za msingi.

Alisema kuwa wakati wao wakiendelea kuandaa malipo waliwataka walimu hao wakaripoti lakini walichelewa kuripoti hali ambayo ili wasababisha wachelewe kufanya malipo ya uhamisho kutokana na walimu wenyewe kuchelewesha kupeleka madai yao.

Kwa mujibu wa Lukoa, suala kubwa ni changamoto ya kifedha kwani jumla ya fedha wanazodai ni kiasi cha sh. milioni 184.5 kwa ajili ya uhamisho lakini fedha halmashauri walizonazo ni shilingi milioni 23 pekee.

Alisema , idadi ya walimu wanaotakiwa kuhamishwa ni 167 kutoka kwenye shule za sekondari 17.

Alisema kuwa zoezi hilo lilileta mkanganyiko kwa sababu wengi wao hawakuleta viambatanisho mbalimbali vilivyokuwa vinatakiwa ili waweze kulipwa madai yao ya uhamisho.

“Baadhi ya walimu walichelewa kuleta nyaraka mbalimbali kutokana na wengine kupatwa na mshutuko baada ya kuambiwa wakafundishe shule za msingi hali iliyopelekea kuwa na ucheleweshaji wa taratibu za kuwahamisha,” alisema Lukoa.

Alisema ,watakachokifanya ni kuwahamisha wachache kulingana na fedha zilizopo na kupeleka agenda kwenye vikao kuomba fedha ili kuhakikisha walimu wote wanaopaswa kuhamishiwa shule za msingi wanakwenda.

“;Kwa makubaliano na halmashauri hatuna shida kinachotakiwa watekeleze haya tuliyoafikiana ili kusije kukatokea kutoelewana kwa sababu sisi lengo letu ni kuwafundisha watoto na si vinginevyo,” alisema Musa.