IKUPA: JAMII ISIWE KIKWAZO KWA WATU WENYE ULEMAVU KUPATA HAKI YA KUOA NA KUOLEWA

Naibu Waziri Ofisi ya Waziri Mkuu (Watu wenye Ulemavu) Mhe.Stella Ikupa akizungumza jambo wakati wa ufunguzi wa warsha ya mashauriano juu ya uwajibikaji wa masuala ya Watu wenye Ulemavu iliyoshirikisha Wizara,Taasisi na Waratibu wa madawatu yanayoshughulikia masuala ya wenye ulemavu iliyofanyika Juni 27 na 28, 2018 Morena Hotel Jijini Dodoma

Mkuregenzi wa Shirika la ADD Tanzania Bi. Rose Tesha akizungumza jambo na washiriki wa mkutano huo (kulia kwake) ni Naibu Waziri Ofisi ya Waziri Mkuu (Watu wenye Ulemavu) Mhe.Stella Ikupa (kushoto kwake) ni Mwenyekiti wa Shirika la Vyama vya Watu wenye Ulemavu Tanzania (SHIVYAWATA) Bi. Ummy Nderiananga.

Kaimu Mkuu Kitengo cha Wenye Ulemavu Bw. Jacob Mwinula akizungumza na washiriki kutoka kwenye Wizara na Taasisi mbalimbali juu ya ujumuishwaji wa masuala ya Watu wenye Ulemavu walipokutana Jijini Dodoma 28 Juni, 2018.

Mmoja wa wajumbe wa warsha hiyo Bw. Kaganzi Rutachwagyo akielezea jambo kwa washiriki (hawapo pichani) waliohudhuria warsha hiyo Jijini Dodoma.

Baadhi ya washiriki wakifuatilia igizo fupi lililokuwa likielezea jinsi gani jamii imekuwa ikiwatenga Watu wenye Ulemavu kupata huduma mbalimbali ambazo katika jamii.

Baadhi ya washiriki wakifuatilia uwasilishwajji wa mada mbalimbali katika warsha hiyo, (Katikati) ni mkalimani wa lugha za alama Bi. Hawa Manyilika akimfafanulia Bw. Frolence Libogoma (mwenye uziwi).

Sehemu ya washiriki wakifuatilia mada zilizowasilishwa.

Naibu Waziri Ofisi ya Waziri Mkuu (Watu wenye Ulemavu) Mhe.Stella Ikupa akiwa kwenye picha ya pamoja na washiriki wa warsha hiyo mara baada ya ufunguzi rasmi uliofanyika Jijini Dodoma Juni, 2018.

(PICHA ZOTE NA OFISI YA WAZIRI MKUU

…………………….

NA.MWANDISHI WETU

Naibu Waziri Ofisi ya Waziri Mkuu (Watu wenye Ulemavu) Mhe.Stella Ikupa ameiasa jamii kutokuwa kikwazo kwa watu wenye ulemavu kupata haki ya kuoa na kuolewa kutokana na

mitazamo hasi inayowagandamiza.

Rai hiyo ameitoa wakati wa kufungua Warsha ya siku mbili Juni 28 hadi 29, 2018 iliyofanyika katika Hoteli ya Morena Jijini Dodoma.

Lengo kuu la warsha hiyo lilikuwa kujadili na kupeana mikakati ya namna bora ya ujumuishwaji, usimamizi na utekelezaji wa masuala ya Watu wenye Ulemavu ambapo ilihusisha Wizara na Taasisi zinazohusika na masuala ya Watu wenye Ulemavu nchini pamoja na Waratibu wa madawati ya Watu wenye Ulemavu kutoka katika Wizara na Taasisi mbalimbali.

Waziri Ikupa alieleza kuwa jamii inapaswa kubadili mitazamo hasi inayokiuka haki za watu wenye ulemavu kwani kumekuwa na mila na desturi potofu za kuwaona watu wenye ulemavu kama wasiojiweza na wasiostahiri kuwa na mahusiano ya kimapenzi na mtu asiye na ulemavu.

 “Jamii inapaswa kuwathamini na kuwapa fursa sawa watu wenye ulemavu hususan kwa kuheshimu maamuzi yao na kuwapa uhuru katika kuchagua watu sahihi wa kuishi nao pasipo vikwazo vyovyote,”alisema Ikupa

Naye Mkurugenzi wa Shirika la Action on Disability and Development (ADD) Bi. Rose Tesha alifafanua umuhimu wa kuangalia makundi ya watu wenye ulemavu katika kupewa haki na usawa katika maamuzi ya kimsingi ikiwemo maamuzi ya kuchagua wenza wao katika maisha ya ndoa.

“Kimsingi ni kuangalia namna gani watu wenye ulemavu wataweza kupata fursa sawa kama aliyo mwanadamu mwingine kwa kutambua ni nini wanahitaji kufanya katika jamii yao sambamba na malengo waliyonayo, kwa kufanya hiyo itasaidia kutatua changamoto zinazowakabili,” alisema Tesha.

Aidha, Kaimu Mkuu wa Kitengo cha Wenye Ulemavu Ofisi ya Waziri Mkuu Bw. Jacob Mwinula aliungamkono rai iliyotolewa na Naibu Waziri kwa kuitaka jamii kubadili mitazamo inayogandamiza haki na usawa kwa wenye ulemavu ili kuwa na jamii jumuishi.

“Watu wenye ulemavu wamekuwa wakikumbana na changamoto kwenye masuala ya mahusiano ambapo jamii imekuwa kikwazo kwa kutowapa ushirikiano, hivyo jamii yetu ikiwa yenye mazingira jumuishi itasaidia kupunguza au kukomesha kabisa changamoto hizi,” Alisema Mwinula.