KUKAMATWA KWA MTUHUMIWA WA WIZI KWA NJIA YA MTANDAO.

**********************************

Jeshi la Polisi Mkoa wa Mbeya linamshikilia JOSEPH SHILA [29] Mwalimu Shule ya Msingi Mwakareli na Mkazi wa Mwakareli kwa tuhuma za wizi wa fedha Tshs.Milioni 34,000,000/= mali ya mwalimu mstaafu GIDEON NGOLAKO MWALUJOBO [60] Mkazi wa Mwakareli.

Mtuhumiwa alikamatwa mnamo tarehe 30.06.2020 majira ya saa 19:00 Usiku huko Kijiji na

Kata ya Mwakareli, Tarafa ya Busokelo, Wilaya ya Rungwe, Mkoa wa Mbeya baada ya kupata taarifa toka kwa msiri. Mtuhumiwa alifanikiwa kuiba pesa hizo mali ya mwalimu mstaafu GIDEON NGOLAKO MWALUJOBO [60] Mkazi wa Mwakareli kupitia akaunti 6140201871 kwa kutumia “NMB Mobile” katika Tawi la NMB Mbalizi Road baada ya kupata namba ya siri ya mhanga ambaye walikuwa ni Walimu wa Shule moja na marafiki wa siku nyingi. 

Mtuhumiwa pia anajihusisha na uwakala wa kusajili laini za simu kwa kutumia mfumo wa kisasa wa alama za vidole ambapo aliweza kutengeneza laini ya simu kwa jina la Mhanga na kutokana na kuaminiana na mhanga pia alikuwa ana mpa kadi yake ya Benki kwa ajili ya kumtolea fedha.

Katika upekuzi uliofanywa nyumbani kwa mtuhumiwa amekutwa na fedha taslimu Tshs.Milioni 20,780,000/=, Kadi ya Benki NMB, Simu tatu [03] aina ya Tecno na laini mbili za simu. Upelelezi wa shauri hili unaendelea na mara baada ya kukamilika mtuhumiwa atafikishwa mahakamani.

WITO WA KAMANDA.

Kamanda wa Polisi Mkoa wa Mbeya Kamishna Msaidizi Mwandamizi wa Polisi ULRICH MATEI anatoa wito kwa wananchi kuwa makini na kadi zao za Benki ikiwa ni pamoja na kuhakikisha wanatunza namba ya siri ili kujiepusha na matukio ya wizi. Aidha anasisitiza kuendelea kuhakiki usajili wa laini zetu kwa kubonyeza *106# chagua 2, ingiza nambari ya kitambulisho chako cha NIDA kisha utapata kujua kitambulisho chako kimetumika kusajili laini ngapi na endapo kuna dosari zozote ni vyema kutoa taarifa mapema katika mamlaka husika kwa hatua zaidi.

KUKAMATWA KWA WATUHUMIWA WA TUKIO LA MAUAJI.

Jeshi la Polisi Mkoa wa Mbeya linawashikilia watuhumiwa watano wa familia moja 1. CHAUSIKU MAHMOD [50] Mke wa Marehemu, 2. IDRISA ALLY [20] 3. HAWA ALLY [20] 4. SALIMA ALLY [19] na JUMANNE ALLY [30] kwa tuhuma za mauaji ya ALLY HAMIS @ MAZINGE [66] Mkazi wa Ubaruku.

Tukio hili limetokea mnamo tarehe 26.06.2020 majira ya saa 00:40 Usiku huko Kitongoji cha Mbuyuni kilichopo Kijiji cha Mpakani, Kata ya Ubaruku, Tarafa ya Rujewa, Wilaya ya Mbarali. Mkoa wa Mbeya ambapo watuhumiwa walimvizia marehemu akiwa amelala kisha kumkata kwa panga sehemu ya shavu la kulia na kidevuni.

Chanzo cha tukio ni tamaa ya mali kwani mke na watoto wa marehemu walipanga kuuza eneo wanaloishi ambalo mnunuzi alipanga kujenga “Filling Station” lakini wakati wa uhai wake marehemu aliwakatalia kuuza eneo hilo kwa sababu sehemu ya eneo hilo kuna nyumba ambayo wanaishi hivyo marehemu alionekana ni kikwazo katika mipango yao. Upelelezi wa shauri hili unaendelea na mara baada ya kukamilika watuhumiwa watafikishwa mahakamani.

WITO WA KAMANDA.

Kamanda wa Polisi Mkoa wa Mbeya Kamishna Msaidizi Mwandamizi wa Polisi ULRICH MATEI kwa jamii kuacha tamaa ya mali ambayo kwa kiasi kikubwa husababisha mauaji ya watu wasio kuwa na hatia na badala yake watafute mali kwa kufanya kazi itakayowasaidia kujipatia kipato halali. Jeshi la Polisi halitasita kumchukulia hatua za kisheria mtu, watu au kikundi cha watu kitakachojihusisha na uhalifu wa aina yoyote.

Aidha anatoa rai kwa wananchi kuendelea kulipa ushirikiano Jeshi la Polisi Mkoa wa Mbeya kwa kutoa taarifa za uhalifu na wahalifu pia kuwapa ushirikiano Polisi Kata waliopo katika maeneo yao ili tuweze kutokomeza uhalifu na matukio yote ambayo ni kero kwa jamii.

TAARIFA YA KIFO CHIMALA.

Mnamo tarehe 25.03.2020 majira ya saa 07:00 Asubuhi huko Chimala, Wilaya ya Mbarali na Mkoa wa Mbeya, TULIZO KONGA [34] Mkazi wa Chimala alifariki dunia nyumbani mnamo tarehe 27.03.2020 alizikwa katika makabuli ya Chimala na mazishi hayo yalihudhuriwa na ndugu wa pande zote mbili.

Kwa mujibu wa taarifa ya Daktari wa Hospitali ya Mission Chimala ilieleza kuwa marehemu alikuwa na tatizo la kiafya kwani alikuwa na uvimbe kichwani na walishampeleka Hospitali ya Mission Ikonda na baadae Hospitali ya Taifa Muhimbili na alitakiwa kufanyiwa upasuaji lakini ndugu wa marehemu walikataa kwa kuogopa angepoteza Maisha. Pia kutokana na tatizo hilo alikuwa amepata ugonjwa wa kifafa na hivyo tangu Madaktari waamue afanyiwe upasuaji marehemu hakuwahi kupata tiba ya upasuaji hadi mauti yanamkuta.

Baada ya wiki mbili kupita walifika Kituo cha Polisi Chimala kutoa malalamiko yako kwamba 1. Hawakujulishwa marehemu pindi anaugua 2. Marehemu alipofikishwa Hospitali ya Mission Chimala hawakupata fursa ya kumuona mpaka walipoambiwa na Daktari kuwa amefariki 3. Wakati wa kuchukua mwili wa marehemu kutoka Chumba cha kuhifadhiwa maiti Hospitali ya Meta hawakushirikishwa kumuandaa wala hawakumuona 4. Wakati wa mazishi hapakuwa na ratiba ya kuaga mwili hivyo hawakumuona na wala hawakuwa na uhakika kama aliyezikwa ndiyo marehemu ndugu yao. Hivyo kwa ujumla walikuwa na mashaka na kifo cha ndugu yao.

Polisi tulifanya uchunguzi wa awali na hatimaye tuliwasiliana na Mkuu wa Mashtaka Mkoa kwa ajili ya kupata Amri ya Mahakama ya kufukua mwili. Baada ya amri ya Mahakama kutolewa, tulimuandaa Daktari Bingwa wa Uchunguzi wa Vifo [PATHOLOGIST] Dkt.Muller wa Hospitali ya Rufaa Kanda ya Mbeya.

Mnamo tarehe 30.06.2020 majira ya saa 16:00 jioni huko katika makabuli yaliyopo Kijiji cha Igumbilo lilifanyika zoezi la kufukua mwili wa marehemu kwa kushirikiana na ndugu wa marehemu, uongozi wa serikali ya Kijiji, Daktari Bingwa wa Uchunguzi wa Vifo Dkt Muller na Jeshi la Polisi.

Baada ya kufukua mwili huo, ndugu wa marehemu walipata fursa ya kuuona na kuutambua na baadae uchunguzi wa kina ulienda kufanyika Hospitali ya Mission Chimala akiwemo Daktari kutoka upande wa ndugu wa marehemu. Pia katika uchunguzi huo kuna sampuli zilizochukuliwa na kupelekwa Maabara ya Mkemia Mkuu wa Serikali Kanda ya Nyanda za Juu kwa uchunguzi zaidi.

Kwa sasa tunasubiri majibu ya kitaalamu kutoka kwa Daktari Bingwa aliyefanya uchunguzi huo na majibu kutoka Maabara ya Mkemi Mkuu wa Serikali kutokana na sampuli zilizopelekwa.

WITO WA KAMANDA.

Kamanda wa Polisi Mkoa wa Mbeya Kamishna Msaidizi Mwandamizi wa Polisi ULRICH MATEI anatoa wito kwa ndugu wa marehemu na jamii kwa ujumla kuwa watulivu wakati tunasubiri majibu ya kitaalamu kutoka kwa Daktari Bingwa aliyefanya uchunguzi huo na majibu kutoka Maabara ya Mkemi Mkuu wa Serikali ili haki iweze kutendeka.