MAOFISA TARAFA SIMANJIRO WAPATIWA PIKIPIKI

Mkuu wa Wilaya ya Simanjiro Mkoani Manyara, mhandisi Zephania Chaula akikabidhi funguo ya moja ya pikipiki sita kwa Ofisa Tarafa ya Moipo Joseph Mtataiko zilizotolewa na Rais John Magufuli.

……………………………………………………………………………………

MKUU wa Wilaya ya Simanjiro Mkoani Manyara, Zephania Chaula amekabidhi pikipiki sita

kwa ajili ya maofisa wa Tarafa wa wilaya hiyo walioahidiwa na Rais John Magufuli Juni 4 mwaka jana.

Chaula akikabidhi pikipiki hizo alisema maofisa tarafa wote sita wa tarafa za Naberera, Moipo, Emboreet, Terrat, Ruvu Remit na Msitu wa Tembo wamepatiwa pikipiki hizo.

Aliwataka maofisa tarafa hao kutumia nyenzo hizo kuhudumia jamii kwa kuwafikia kwa urahisi zaidi tofauti na hapo awali kabla hawajakabidhiwa.

Alimpongeza Rais Magufuli kwa kutimiza ahadi yake aliyotoa Juni 4 mwaka jana baada ya kukutana na maofisa tarafa wa nchi nzima na kuwaahidi kuwapatia pikipiki kila mmoja kwa ajili ya kuzitumia kwenye majukumu yao.

Alisema pikipiki hizo zitakuwa msaada mkubwa kwa viongozi hao kwani wilaya ya Simanjiro kijiografia ni kubwa ina zaidi ya kilomita 21,000.

“Simanjiro ni kubwa mno mfano tarafa ya Naberera ina ukubwa wa zaidi ya kilomita 8,000 na imezishinda ukubwa baadhi ya wilaya zenye ukubwa wa kilomita 3,000 hivyo changamoto ya ukubwa ipo,” alisema.

Aliwataka viongozi hao kuzitunza pikipiki hizo kwa kuzitumia kwa matumizi waliyopewa na serikali na siyo vinginevyo huku wakiepuka ajali za uzembe.

“Msitumie hizi pikipiki kama bodaboda na kuanza kubebea abiria kwani mmepewa kwa sababu ya kuendesha shughuli zenu za kila siku tarafani mwenu mfike kwenye kata zenu na vijiji vyenu,” alisema Chaula.

Ofisa Tarafa ya Moipo Joseph Mtataiko akizungumza kwa niaba ya maofisa Tarafa wenzake amemuahikishia mkuu huyo wa wilaya kuwa watafanya kazi zao kwa wepesi zaidi tofauti na awali.

“Kupitia usafiri huu tutazidi kuchapa kazi zaidi na zaidi kwani utawasaidia kufika katika maeneo yao hasa sehemu za pembezoni wanazozisimamia kiutendaji hususani tarafa ya Moipo.

“Pamoja na hayo tunamshukuru na kumpongeza Rais Magufuli kwa kutimiza ahadi yake kwetu kwani Juni 4 mwaka jana alitualika Ikulu jijini Dar es salaam na kutuahidi kupatiwa pikipiki,” alisema.