MAHAKAMA YA DODOMA YAMREJESHEA DHAMANA MWENYEKITI WA JUMUIYA YA WAFANYABIASHARA

Mahakama ya Wilaya ya Dodoma jana ilimwachia Mwenyekiti wa Jumuiya ya Wafanyabiashara nchini, Johnson Minja kuendelea na dhamana yake baada ya kujiridhisha kuwa hakuvunja masharti ya dhamana yake tangu aliapoachiwa kwa dhamana Januari 28 mwaka huu.

Hakimu Mfawidhi wa Mahakama ya Wilaya ya Dodoma, Rhoda Ngimilanga alisema kuwa ameridhishwa na upande wa utetezi kuwa mshtakiwa hajawahi kuvunja masharti ya dhamana yake tangu alipoachiwa kwa dhamana Januari 28 mwaka huu.

Awali mwendesha mashtaka mwandamizi wa serikali, Rose Shio aliiambia mahakama kuwa upelelezi wa kesi hiyo umeshakamilika ambapo April 9 itaanza kusikilizwa kwa usikilizwaji wa awali.

Hata hivyo aliiomba mahakama hiyo kuendelea kuzuia dhamana ya Mshtakiwa kwa kuwa bado hapakuwa na utulivu wa amani nje kutokana na wafanyabiashara kuendeleza migomo ya kufungua maduka yao pamoja na kugoma kuendelea kutumia mashine za kieletroniki za Efds.

MUHAMMADU BUHARI AJIPONGEZA KWA USHINDI NA KUSEMA NI KURA YA MABADILIKO

Mshindi wa urais katika uchaguzi wa Nigeria Muhammadu Buhari, amepongeza ushindi wake kuwa ni wa kura ya mabadiliko na uthibitisho kukua kwa demokrasia nchini humo.

Buhari pia amempongeza rais anayeondoka madarakani Goodluck Jonathan kama mpinzani wa kweli, ambaye ameridhia kuachia madaraka kwa njia ya amani.

Buhari ambaye ni Jenerali wa zamani wa jeshi la Nigeria amemshinda Jonathan kwa kura milioni 15.4 dhidi ya milioni 13.3.